കോതമംഗലം: മാർതോമ ചെറിയ പള്ളിയിൽ കബറടങ്ങിയിരിക്കുന്ന എൽദോ മോർ ബസേലിയോസ് ബാവയുടെ കബർ സംരക്ഷിക്കണമെന്നാവശ്യപ്പെട്ട് മതമൈത്രി സംരക്ഷണ സമിതി ഇടുക്കി പള്ളിവാസലിൽ നിന്ന് ചെറിയ പള്ളിയിലേക്ക് സംഘടിപ്പിച്ച രഥയാത്ര പ്രയാണം ബസേലിയോസ് ബാവ ആദ്യമായി ഇന്ത്യയിൽ എത്തി ചേർന്ന പള്ളിവാസലിലെ അള്ളാ കോവിലിൽ (ബസേലിയോസ് നഗർ) നിന്ന് ആരംഭിച്ചു. രാവിലെ 11 മണിയോടെയാണ് രഥയാത്ര പ്രയാണം ആരംഭിച്ചത്. രാജ്യത്തിന്റെ പൈതൃക സമ്പത്തായ എൽദോ ബാവയുടെ കബറിടം കോട്ടയം കാതോലിക്ക വിഭാഗത്തിന് വിട്ട് കൊടുക്കുകയില്ലെന്ന് പ്രഖ്യാപിച്ച് നൂറ് കണക്കിന് വാഹനങ്ങളുടെ അകമ്പടിയിൽ ജാതിമത ചിന്തകൾ മാറ്റി വച്ച് ആയിരക്കണക്കിന് ജനങ്ങൾ രഥയാത്രയിൽ പങ്കാളികളായത്. പഞ്ചായത്ത് പ്രസിഡണ്ട് കുമാരി തുളസി ഭായി കൃഷ്ണ മതമൈത്രി സംരക്ഷണ സമിതി ചെയർമാൻ എ.ജി ജോർജിന് പതാക കൈമാറി.

മാർ തോമ ചെറിയ പള്ളിയിലെ നൂറ്റാണ്ടുകളായുള്ള വിശ്വാസത്തെ കോടതി മുഖേനെ ഇല്ലായ്മ ചെയ്യുവാൻ ശ്രമിച്ചാൽ അതിനെതിരെ ശക്തമായ പ്രതിഷേധവുമായി പള്ളിവാസൽ ഗ്രാമ പഞ്ചായത്തും ഉണ്ടാകുമെന്ന് തുളസി ഭായി കൃഷ്ണ പറഞ്ഞു. വൈസ് പ്രസിഡന്റ് ടി.സിദ്ധിക്ക്, മുൻസിപ്പൽ ചെയർ പേഴ്സൺ മഞ്ചു സിജു, മതമൈത്രി നേതാക്കളായ കെ.എ നൗഷാദ്, അഡ്വ.രാജേഷ് രാജൻ, കെ. പി ബാബു, ബിനോയി മണ്ണഞ്ചേരി, ബാബുപോൾ മാറാച്ചേരി, ഫാ.ഐസക് കോറെപ്പിസ്കോപ്പ മേനോത്ത്മാലി, ഫാ.എൽദോസ് കുറ്റിപ്പാല കോറെപ്പിസ്കോപ്പാ, ഫാ.എൽദോസ് അരിപ്പിള്ളി എന്നിവർ പ്രസംഗിച്ചു. രാവിലെ രാജകുമാരി യാക്കോബായ സുറിയാനി പള്ളിയിൽ പ്രാർത്ഥനക്ക് ശേഷമാണ് അള്ളാ കോവിലിൽ നിന്ന് രഥ പ്രയാണം ആരംഭിച്ചത്. ആനച്ചാൽ ടൗണിൽ പൗരാവലിയുടെയുടെയും നിരവധി പളളികളുടെയും സ്വീകരണത്തിന് ശേഷം പുറപ്പെട്ട രഥയാത്രയെ അടിമാലി ടൗണിൽ പഞ്ചായത്തും വ്യാപാരി വ്യവസായി സമിതിയും ചേർന്ന് രഥ പ്രയാണത്തെ സ്വീകരിച്ചു.

അടിമാലിയിൽ ഇഞ്ചക്കുടി ടെക്സ്റ്റയിൽസും വിപുലമായ സ്വീകരണം ഒരുക്കി. ഇരുമ്പ് പാലത്ത് യൂത്ത് ലീഗിന്റെ നേതൃത്വത്തിൽ സ്വീകരണമൊരുക്കി. നേര്യമംഗലത്തും നെല്ലിമറ്റത്തും പൗരസമിതിയുടെ നേതൃത്വത്തിൽ രഥയാത്രയെ സ്വീകരിച്ചു. തുടർന്ന് മലയിൻകീഴ് തങ്കളം ബൈപ്പാസ് റോഡ് വഴി നഗരത്തിലേക്ക് പ്രവേശിച്ച കോതമംഗലം മുത്തപ്പന്റെ ഛായാചിത്രം വഹിച്ചുകൊണ്ടുള്ള രഥം മാർ തോമ ചെറിയ പള്ളിയുടെ സമരപന്തലിലെത്തിയപ്പോൾ യാക്കോബായ സുറിയാനി സഭയുടെ ശ്രേഷ്ഠ കാതോലിക്ക ബാവ ഡോ.ബസേലിയോസ് തോമസ് പ്രഥമൻ ബാവയുടെ നേതൃത്വത്തിൽ സ്വീകരിച്ചു. ദേശത്തിന്റെ കെടാവിളക്ക് അണയാതിരിക്കാൻ ഈ നാട് കാണിക്കുന്ന കരുതലിന് ശ്രേഷ്ഠ കാതോലിക്ക ബാവ നന്ദി പറഞ്ഞു. യാക്കോബായ സഭയുടെ പ്രതിസന്ധി കാലഘട്ടത്തിൽ നാടും നാട്ടുകാരും എന്നും കൂടെ നിന്നതും നന്ദിയോടെ ഓർക്കുന്നുവെന്നും, സഭയെന്നും സമൂഹത്തോട് കടപ്പെട്ടിരിക്കുന്നുവെന്നും ബാവ കൂട്ടി ചേർത്തു. നാളെ ആലുവ എസ്.പി ഓഫീസിലേക്ക് നടത്തുന്ന മാർച്ചിൽ എല്ലാവരും പങ്കെടുക്കണമെന്നും ബാവ ആഹ്വാനം ചെയ്തു.