കോതമംഗലം: കൊച്ചി – ധനുഷ്കോടി ദേശിയ പാതയുടെ നേര്യമംഗലം മുതല് വാളറ വരെയുള്ള വികസനത്തിന്റെ വിഷയത്തില് ഡീന് കുര്യാക്കോസ് എംപി മുഖ്യമന്ത്രിക്ക് നിവേദനം നല്കി. മുഖ്യമന്ത്രി വി.ഡി സതീശനെ ചുമതലയേറ്റെടുത്തതിനു ശേഷം ആദ്യമായി ഓഫീസില് സന്ദര്ശിച്ചപോഴാണ് ദേശീയപാത 85മായി ബന്ധപ്പെട്ട നിവേദനം കൈമാറിയത്. ദേശീയ പാത 85ല് നേര്യമംഗലം – മുതല് വാളറ വരെയുള്ള 14 കി.മീ ഭാഗം വീതിയെടുക്കുന്നത് തടസ്സപ്പെട്ടിട്ട് ഏകദേശം ഒരു വര്ഷമാകുന്നു. സ്വകാര്യവ്യക്തി ഹര്ജിയുമായി ഹൈക്കോടതിയെ സമീപിക്കുകയും, അഡീഷണല് ചീഫ് സെക്രട്ടറി അതിനോട് യോജിച്ച സത്യവാങ്മൂലം നല്കുകയും ചെയ്തപ്പോള് ആണ് കോടതി വിധി എതിരായത്.
പിന്നീട് ജനകീയ പ്രതിഷേധത്തെ തുടര്ന്ന് സര്ക്കാര്, യഥാര്ത്ഥത്തില് ളള്ള വീതി 30 മീറ്റര് എന്നത് പൊതുമരാമത്ത്, റവന്യു രേഖകളില് ഉള്ളത് പ്രകാരം സര്ക്കാര് സത്യവാങ്മൂലം തിരുത്തി നല്കിയിരുന്നു. തുടര്ന്ന് ഹൈക്കോടതി അനുകൂലമായ ഇടക്കാല ഉത്തരവ് പുറപ്പെടുവിച്ചിട്ടും ചീഫ് സെക്രട്ടറിയുടെ നിര്ദേശം അനുസരിച്ച് രൂപീകൃതമായ ഹൈ ലെവല് കമ്മറ്റിയുടെ റിപ്പോര്ട്ടിന്റെ അടിസ്ഥാനത്തില് വേണം റോഡിന്റെ വീതിയെടുക്കല് പൂര്ത്തീകരിക്കാന്. 2 ആഴ്ച്ചക്കകം റിപ്പോര്ട്ട് പൂര്ത്തീകരിച്ച് നല്കണം എന്നായിരുന്നു നിഷ്കര്ഷിച്ചിരുന്നത് എങ്കിലും, 4 മാസം കഴിഞ്ഞിട്ടും റിപ്പോര്ട്ട് നല്കപ്പെട്ടിട്ടില്ല. ഈ അവസ്ഥയില് മഴക്കാലം ആയിട്ടും റോഡ് നിര്മ്മാണം പുനരാരംഭിക്കാന് കഴിയാത്തത് മണ്ണിടിച്ചില് സാധ്യത വര്ദ്ധിപ്പിക്കുമെന്ന ദുരന്ത നിവാരണ അതോറിറ്റിയുടെ റിപ്പോര്ട്ടും വന്നിട്ടുണ്ട്. ഈ വസ്തുതകള് ചൂണ്ടിക്കാണിച്ച് മുഖ്യമന്ത്രി വി.ഡി സതീശന് വിശദമായ കത്ത് നല്കി .
വിഷയത്തിന്റെ അടിയന്തിര പ്രാധാന്യം കണക്കിലെടുത്ത്, ഉടന് തന്നെ ഇടപെടണമെന്നും, സര്ക്കാര് രേഖകളില് ഉളളതുപോലെയും ഹൈക്കോടതിയില് നല്കിയ സത്യവാങ്മൂലത്തില് സൂചിപ്പിച്ചതു പോലെയും 30 മീറ്റര് വീതി ലഭ്യമാക്കണമെന്നും ചീഫ്സെക്രട്ടറിയെ ഫോണില് വിളിച്ച് അദ്ദേഹം നിര്ദ്ദേശം നല്കുകയുണ്ട്.
