മാൾട്ട : യൂറോപ്യന്‍ യൂണിയനിലെ രാജ്യമായ മാള്‍ട്ടയുടെ ക്രിക്കറ്റ് അസോസിയേഷന്റെ സെക്രട്ടറി സ്ഥാനത്തേക്ക് തെരഞ്ഞെടുക്കപ്പെട്ടിരിക്കുന്നത്‌ കോതമംഗലവുമായി വേരുകളുള്ള സിറില്‍ മാത്യു എന്ന യുവാവ്. നെല്ലിമറ്റം MBITS എഞ്ചിനീയറിങ് കോളേജില്‍ നിന്നും പഠനം പൂര്‍ത്തിയാക്കിയ സിറില്‍ സ്‌കൂള്‍ കാലഘട്ടത്തില്‍ സജീവമായി ക്ലബ് ക്രിക്കറ്റിലുണ്ടായിരുന്നു. കോളേജിലെ ആദ്യ ഇലക്ടോണിക് ബാച്ചായ 2009 – 2013 വർഷത്തിലെ പൂർവ്വ വിദ്യാർത്ഥിയാണ് സിറിൽ.
അടിമാലി പുല്ലന്‍ മാത്യു- മോളി ദമ്പതികളുടെ മകനാണ് സിറില്‍ മാത്യു. ഐസിസി ലോക റാങ്കിങ്ങില്‍ 72- യാം സ്ഥാനത്തുള്ള രാജ്യമാണ് മാള്‍ട്ട. മൂന്നു വര്‍ഷത്തോളമായി മാള്‍ട്ടയില്‍ കമ്പ്യൂട്ടര്‍ എഞ്ചിനീയറായി ജോലി നോക്കുന്നതിനൊപ്പം മാള്‍ട്ടയിലെ ക്ലബ് ക്രിക്കറ്റില്‍ സജീവമായിരുന്നു സിറില്‍. കൗമാരക്കാരുടെ കായിക തലസ്ഥാനമായ കോതമംഗലത്തിനും, MBITS കോളേജിനും അഭിമാനകരമായ നേട്ടമാണ് സിറിലിലൂടെ കൈവന്നിരിക്കുന്നത്.
You must be logged in to post a comment Login