കോതമംഗലം : കഴിഞ്ഞ ബുധനാഴ്ച്ച (25/6/2025) പൂയംകൂട്ടി മണികണ്ഠൻ ച്ചാലിൽ ഒഴുക്കിൽപ്പെട്ട് കാണാതായ വി ജെ രാധാകൃഷ്ണനെ (ബിജു) കണ്ടെത്തുന്നതിനായി നടത്തുന്ന തിരച്ചിൽ ജില്ലയിലെ മറ്റ് മേഖലകളിലേക്കും (കുന്നത്ത്നാട്,ആലുവ താലൂക്കുകളുടെ പരിധിയിലും) വ്യാപിപ്പിക്കണമെന്ന് ആന്റണി ജോൺ എംഎൽഎ ജില്ലാ വികസന സമിതിയിൽ ആവശ്യപ്പെട്ടു.
കൂടാതെ കാല വർഷം ശക്തമായതിനെ തുടർന്ന് പലപ്പോഴും ഒറ്റപ്പെട്ട് പോകുന്ന കുട്ടമ്പുഴ പഞ്ചായത്തിലെ ആദിവാസി മേഖലകളിൽ ജില്ലാ ഭരണ കൂടവും,ട്രൈബൽ ഡിപ്പാർട്ട്മെന്റും പ്രത്യേക ശ്രദ്ധ നൽകണം,കോതമംഗലം മണ്ഡത്തിലെ വിവിധ പഞ്ചായത്തുകളിൽ നേരിടുന്ന വന്യ മൃഗ ശല്യത്തെ പ്രതിരോധിക്കാൻ പ്രഖ്യാപിച്ചിട്ടുള്ള പദ്ധതികളുടെ സമയ ബന്ധിതമായിട്ടുള്ള പൂർത്തീകരണം കോതമംഗലം,മൂന്നാർ,മലയാറ്റൂർ ഡി എഫ് ഒ മാർ ഉറപ്പുവരുത്തണം,കൊച്ചി-ധനുഷ്കോടി ദേശീയപാത നിർമ്മാണത്തിലെ അസ്ത്രീയതമൂലം കവളങ്ങാട് പ്രദേശത്ത് രൂപപ്പെട്ടിട്ടുള്ള വലിയ വെള്ളക്കെട്ട് അടിയന്തിരമായി ഒഴിവാക്കാൻ എൻ എച്ച് എ ഐ ഫല പ്രദമായ നടപടികൾ സ്വീകരിക്കണം,റീ ബിൽഡ് കേരള പദ്ധതിയിൽ ഉൾപ്പെടുത്തി കോതമംഗലം കുട്ടമ്പുഴ പഞ്ചായത്തിലെ വെള്ളാരംക്കുത്ത്- മണികണ്ഠൻച്ചാൽ റോഡിൻറെ നിർമ്മാണം സമയ ബന്ധിതമായി പൂർത്തീകരിക്കുന്നതിനാവശ്യമായ നടപടികൾ സ്വീകരിക്കണം,പിണ്ടിമന പഞ്ചായത്തിലെ വെറ്റിലപ്പാറയിൽ ദശലക്ഷം രാജീവ് ഗാന്ധി നഗറിൽ കഴിഞ്ഞ ദിവസം ശക്തമായ മഴയെ തുടർന്ന് വീട് തകർന്ന സംഭവത്തിൽ അടിയന്തിരമായി നഷ്ട പരിഹാരം ലഭ്യമാക്കണം . 35 വർഷം മുൻപ് ഹൗസിംഗ് ബോർഡ് നിർമ്മിച്ച നൽകിയ ടി നഗറിലെ മറ്റ് കുടുംബങ്ങളുടെ സുരക്ഷ ഉറപ്പുവരുത്താനാവശ്യ മായ നടപടികൾ സ്വീകരിക്കണം തുടങ്ങിയ വിവിധ വിഷയങ്ങൾ എം എൽ എ ജില്ലാ വികസന സമിതിയുടെ ശ്രദ്ധയിൽ കൊണ്ടുവന്നു .
