മൂവാറ്റുപുഴ: ഗൂഗിള്‍ പേയുടെ വ്യാജ സ്‌ക്രീന്‍ ഷോട്ട് കാണിച്ച് പണം തട്ടിയ യുവാവ് അറസ്റ്റില്‍. പെരുമ്പാവൂര്‍ കാഞ്ഞിരക്കാട് പള്ളിപടി കോന്നംകുടി ആസിഫ് കെ ഹസന്‍ (28)നെയാണ് മൂവാറ്റുപുഴ എസ്എച്ച്ഒ സുബിന്‍ ബിജുവിന്റെ നേതൃത്വത്തിലുള്ള അന്വേഷണ സംഘം അറസ്റ്റ് ചെയ്തത്. ബുധനാഴ്ച മൂവാറ്റുപുഴയിലെ എടിഎമ്മില്‍ പണം നിക്ഷേപിക്കാന്‍ ചെന്നയാളില്‍ നിന്നും ഗൂഗിള്‍ പേയുടെ വ്യാജ സ്‌ക്രീന്‍ ഷോട്ട് കാണിച്ച് പതിനായിരം രൂപ തട്ടിയെടുക്കുകയായിരുന്നു.
പണം നിക്ഷേപിക്കാന്‍ വരുന്നവരോട് തനിക്ക് എടിഎമ്മില്‍ നിന്നും പണമെടുക്കാന്‍ സാധിക്കുന്നില്ലയെന്നും പണം നല്‍കിയാല്‍ ഗൂഗിള്‍ പേ വഴി പണം ട്രാന്‍സ്ഫര്‍ ചെയ്തു നല്‍കാമെന്നും പറഞ്ഞ് വിശ്വസിപ്പിച്ച്, ഗൂഗിള്‍ പേ ചെയ്‌തെന്ന രീതിയില്‍ വ്യാജ സ്‌ക്രീന്‍ ഷോട്ട് കാണിച്ചാണ് പ്രതി തട്ടിപ്പ് നടത്തി വന്നിരുന്നത്. സമാന തട്ടിപ്പിന്, മുമ്പ് റിമാന്‍ഡില്‍ കഴിഞ്ഞിട്ടുള്ള പ്രതി ഇത്തരത്തില്‍ വേറെയും തട്ടിപ്പുകള്‍ നടത്തിയിട്ടുണ്ടോയെന്ന കാര്യം അന്വേക്ഷിച്ചു വരികയാണ്. എസ്‌ഐമാരായ ആര്‍.ബി റോഷ്നി, സി.ബി അനില്‍ കുമാര്‍, സീനിയര്‍ സിവില്‍ പോലീസ് ഓഫീസര്‍മാരായ സന്ദീപ് ബാബു, ഇര്‍ഫാന്‍ ഹബീബ്, എം.പി രതിഷ്, ശ്രീജു രാജന്‍, വിപിന്‍ വര്‍ക്കി, ഷിജു രാജപ്പന്‍ എന്നിവരും അന്വേഷണ സംഘത്തിലുണ്ടായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
