കോതമംഗലം: 141 അര്‍ഹരായ വയോജനങ്ങള്‍ക്ക് സൗജന്യമായി മുഴുവന്‍ പല്ല് സെറ്റുകള്‍ നല്‍കി മാര്‍ ബസേലിയോസ് ഡെന്റല്‍ കോളേജ് ചരിത്രനേട്ടത്തിലേക്ക്. കാതമംഗലം മാര്‍ത്തോമ ചെറിയപള്ളിയുടെ ആഭിമുഖ്യത്തില്‍ പ്രവര്‍ത്തിക്കുന്ന മാര്‍ ബസേലിയോസ് ഡെന്റല്‍ കോളേജിലെ പ്രോസ്ഥോഡോണ്ടിക്‌സ് വിഭാഗത്തിന്റെ നേതൃത്വത്തില്‍ സംഘടിപ്പിച്ച ‘സുസ്മിതം 2026’ മെഗാ സാമൂഹിക സേവന പദ്ധതി ശ്രദ്ധേയ വിജയമായി. സാമ്പത്തികമായി പിന്നാക്കം നില്‍ക്കുന്ന സമ്പൂര്‍ണ ദന്തനഷ്ടം സംഭവിച്ച 141 അര്‍ഹരായ ഗുണഭോക്താക്കള്‍ക്ക് സൗജന്യമായി മുഴുവന്‍ പല്ല് സെറ്റുകള്‍ നിര്‍മ്മിച്ച് വിതരണം ചെയ്തുകൊണ്ടാണ് കോളേജ് മറ്റൊരു ചരിത്രനേട്ടത്തിന് സാക്ഷ്യം വഹിച്ചത്.
പരമ്പരാഗതമായി കുറഞ്ഞത് അഞ്ച് ക്ലിനിക്കല്‍ സന്ദര്‍ശനങ്ങള്‍ ആവശ്യമായ മുഴുവന്‍ പല്ല് സെറ്റ് നിര്‍മ്മാണ നടപടികള്‍, ഈ പദ്ധതിയുടെ ഭാഗമായി പ്രത്യേകമായി ആസൂത്രണം ചെയ്ത ത്വരിത ചികിത്സാ രീതിയിലൂടെ 24 മണിക്കൂറിനുള്ളില്‍ പൂര്‍ത്തിയാക്കി. ജൂലൈ 19-ന് പ്രധാന ക്ലിനിക്കല്‍, ലബോറട്ടറി നടപടികള്‍ പൂര്‍ത്തിയാക്കിയ ശേഷം ജൂലൈ 20-ന് എല്ലാ ഗുണഭോക്താക്കള്‍ക്കും പല്ല് സെറ്റുകള്‍ വിതരണം ചെയ്തു. പ്രായമായ രോഗികള്‍ക്ക് ആവര്‍ത്തിച്ചുള്ള ആശുപത്രി സന്ദര്‍ശനങ്ങള്‍ ഒഴിവാക്കി മികച്ച ചികിത്സ ലഭ്യമാക്കുക എന്ന ലക്ഷ്യത്തോടെയാണ് ഈ നൂതന മാതൃക നടപ്പിലാക്കിയത്.
ഒരേ വേദിയില്‍ 24 മണിക്കൂറിനുള്ളില്‍ ഏറ്റവും കൂടുതല്‍ സൗജന്യ മുഴുവന്‍ പല്ല് സെറ്റുകള്‍ വിതരണം ചെയ്ത പരിപാടി എന്ന നേട്ടത്തിനായി ഇന്ത്യ ബുക്ക് ഓഫ് റെക്കോര്‍ഡ്‌സിലേക്കുള്ള രേഖപ്പെടുത്തല്‍ നടപടികളും ചടങ്ങിനോടനുബന്ധിച്ച് പൂര്‍ത്തിയാക്കിയതായി കോളേജ് സെക്രട്ടറി സലിം ചെറിയാന്‍, പ്രിന്‍സിപ്പല്‍ ഡോ. ബൈജു പോള്‍ കുര്യന്‍ എന്നിവര്‍ പറഞ്ഞു. കേരള സര്‍ക്കാര്‍ ഫിഷറീസ് വകുപ്പ് മന്ത്രി വി. ഇ. അബ്ദുല്‍ ഗഫൂര്‍ പരിപാടി ഉദ്ഘാടനം ചെയ്തു. കോതമംഗലം മേഖലാ മെത്രാപ്പോലീത്ത അഭിവന്ദ്യ ഏലിയാസ് മാര്‍ യൂലിയോസ് മെത്രാപ്പോലീത്ത അനുഗ്രഹ പ്രഭാഷണം നടത്തി.
