കോതമംഗലം: വിവാഹത്തില് നിന്ന് പിന്മാറണമെന്ന് ആവശ്യപ്പെട്ടതിന് യുവതിയെ ക്രൂരമായി മര്ദിച്ചു. കഴിഞ്ഞ ശനിയാഴ്ചയാണ് സംഭവം. മര്ദനശേഷം കൈകള്ക്കൂട്ടിക്കെട്ടി യുവതിയെ വഴിയില് ഉപേക്ഷിച്ചു.കോതമംഗലം സ്വദേശി നിധിന് ആണ് പോലീസിന്റെ പിടിയിലായിരിക്കുന്നത്. നിധിന്റെ വിവാഹം ഈ വരുന്ന തിങ്കളഴ്ച ആണെന്ന് അറിഞ്ഞതിനെ തുടര്ന്ന് യുവതി ഇയാളെ സമീപിക്കുകയും വിവാഹത്തില് നിന്ന് പിന്മാറണം എന്നാവശ്യപ്പെടുകയുമായിരുന്നു.
സമവായത്തിന് ശ്രമിക്കുന്നതിനിടെയാണ് നിധിന് യുവതിയുമായി കോതമംഗലത്തേയ്ക്ക് പോകുന്നത്. എന്നാല് യാത്രയ്ക്കിടെ കാറില് വെച്ച് യുവതിയെ ഇയാള് ക്രൂരമായി മര്ദിക്കുകയായിരുന്നു. അവശയായ യുവതി മരിച്ചുവെന്ന് കരുതി കൈകള് കൂട്ടിക്കെട്ടി കോതമംഗലത്തെ ന്യൂ ബൈപാസില് ഉപേക്ഷിച്ച് കടന്നുകളയുകയായിരുന്നു. യുവതിയുടെ കൈയില് ഉണ്ടായിരുന്ന 12 പവനോളം സ്വര്ണം നിധിന് കവര്ന്നുവെന്നും ആരോപണമുണ്ട്. പിന്നീട് യുവതി നാട്ടുകാരെ വിവരം അറിയിക്കുകയും ആശുപത്രിയില് എത്തിക്കുകയുമായിരുന്നു. ആശുപത്രി അധികൃതര് പോലീസില് വിവരം അറിയിച്ചതിന്റെ അടിസ്ഥാനത്തിലാണ് കുന്നത്തുനാട് പോലീസ് കേസ് എടുത്തത്. യുവതിയുടെ ആരോഗ്യനില തൃപ്തികരമല്ല. നിധിനുമായി പോലീസ് തെളിവെടുപ്പ് നടത്തി.
