കോതമംഗലം: കോതമംഗലം നഗരസഭയുടെ രൂപീകരണത്തിന് ശേഷം അവതരിപ്പിക്കപ്പെട്ട ബജറ്റുകളില് ബഹുഭൂരിപക്ഷത്തിലും ഇടം നേടിയ പദ്ധതിയാണ് നഗരസഭ ടൗണ് ഹാള്. അതുപോലെ തന്നെയാണ് സ്റ്റേഡിയം പദ്ധതിയും. ബജറ്റ് തയ്യാറാക്കുന്നവര് കണ്ണടച്ച് ടൗണ് ഹാളും വകയിരുത്തിയ ഫണ്ടും പതിവായി എഴുതി ചേര്ക്കുമായിരുന്നു. പതിറ്റാണ്ടുകള് പിന്നിടുമ്പോഴും ബജറ്റ് രേഖകളില് നിന്ന് മോക്ഷം നേടാന് ടൗണ്ഹാള്, സ്റ്റേഡിയം പദ്ധതികള്ക്ക് കഴിഞ്ഞിട്ടില്ല. സ്വന്തമായി ഓഡിറ്റോറിയമോ സ്റ്റേഡിയമോ ഇല്ലാത്ത അപൂര്വം നഗരസഭകളില് ഒന്നാണ് കോതമംഗലം. പൊതുപരിപാടികള് നടത്താന് അന്യരെ ആശ്രയിക്കേണ്ട അവസ്ഥയാണുള്ളത്.
തെരഞ്ഞെടുപ്പിന് ശേഷംഅധികാരത്തിലെത്തിയ കൗണ്സിലുകള് പദ്ധതികള് യാഥാര്ത്ഥ്യമാക്കും എന്ന പ്രഖ്യാപനം നടത്തുന്നത് ഒരു ആചാരമായി മാറി. മാസങ്ങള്ക്ക് മുമ്പ് അധികാരത്തിലെത്തിയ നിലവിലെ കൗണ്സിലും ടൗണ്ഹാള് നിര്മ്മാണത്തിന്റെ കാര്യത്തില് ഉറപ്പ് നല്കിയിട്ടുണ്ട്. ടൗണ് ഹാള് നിര്മ്മാണത്തിനുള്ള സ്ഥലം നഗരസഭക്ക് ഉണ്ട്. സ്റ്റേഡിയം നിര്മ്മിക്കണമെങ്കില് സ്ഥലം കണ്ടെത്തണം.
ടൗണ് ഹാള് നിര്മ്മിക്കുന്നതിന് കുരൂര് തോടിന്റെ കരയില് മൂന്നേക്കര് സ്ഥലം സ്വകാര്യവ്യക്തിയില് നിന്ന് ഏറ്റെടുത്തതാണ്. കാല്നൂറ്റാണ്ടായിട് ഇത് വെറുതെകിടക്കുന്നു. 2011 ല് അധികാരത്തിലെത്തിയ കൗണ്സില് നബാര്ഡ് വായ്പ ഉപയോഗിച്ച് ടൗണ് ഹാള് നിര്മ്മിക്കുന്നതിനായി നടത്തിയ ശ്രമം അവസാനഘട്ടത്തില് എത്തിയിരുന്നു. കുരൂര്തോട് വഴിതിരിച്ചുവിടുന്നത് പാരിസ്ഥിതിക പ്രശ്നങ്ങള്ക്കിടയാക്കുമെന്ന വാദവുമായി എല്ഡിഎഫ് സമരരംഗത്തിറങ്ങിയതോടെ നടപടികള് വഴിമുട്ടി.
രണ്ടാം പിണറായി സര്ക്കാര് നടത്തിയ നവകേരള സദസുമായി ബന്ധപ്പെട്ട് മുഴുവന് നിയോജകമണ്ഡലങ്ങളിലും പ്രത്യേക പദ്ധതികള് പ്രഖ്യാപിച്ചിരുന്നു. കോതമംഗലത്ത് അനുവദിച്ചത് ടൗണ്ഹാള് ആയിരുന്നു. ഏഴ് കോടി രൂപയുടെ പ്രഖ്യാപനമാണ് ഉണ്ടായത്. ഇതുമായി ബന്ധപ്പെട്ട് കഴിഞ്ഞ കൗണ്സിലിന്റെകാലത്ത് ചില നടപടികള് ആരംഭിച്ചിരുന്നു. ഡിപിആര് തയ്യാറാക്കി കിഫ്ബിക്ക് സമര്പ്പിച്ചിട്ടുണ്ടെന്നാണ് അന്നത്തെ ഭരണനേതൃത്വം അവകാശപ്പെട്ടത്. എല്ഡിഎഫ് നേതൃത്വം നല്കിയ കഴിഞ്ഞ കൗണ്സില് തയ്യാറാക്കിയ ഡിപിആര് പ്രകാരമുള്ള ടൗണ് ഹാള് നിര്മ്മാണം പ്രായോഗികമല്ലെന്നാണ് ഇപ്പോഴത്തെ യുഡിഎഫ് കൗണ്സിലിന്റെ നിലപാട്. കോതമംഗലത്തിന്റെ സാദ്ധ്യതകളും വായ്പാതിരിച്ചടവിനുള്ള പ്രാപ്തിയും അനുസരിച്ച് പുതിയ ഡിപിആര് തയ്യാറാക്കാനാണ് ആലോചന.
