കോതമംഗലം : കോതമംഗലം താലൂക്ക് വികസന സമിതി യോഗം ആന്റണി ജോൺ എം എൽ എ യുടെ അദ്ധ്യക്ഷതയില്‍ മിനിസിവില്‍ സ്റ്റേഷന്‍ ഹാളില്‍ ചേർന്നു.തട്ടേക്കാട്‌ പക്ഷിസങ്കേതത്തിന്റെ അതിര്‍ത്തി പുനര്‍ നിര്‍ണ്ണയവുമായി ബന്ധപ്പെട്ട് തുടര്‍ നടപടികള്‍ വേഗത്തില്‍ ആക്കുന്നതിന്‌ ബന്ധപ്പെട്ട വനം വകുപ്പ് ഉദ്യോഗസ്ഥര്‍ക്ക്‌ എം എല്‍ എ നിര്‍ദ്ദേശം നല്‍കി. ബോര്‍ഡ്‌ ഓഫ്‌ വൈല്‍ഡ്‌ ലൈഫില്‍ നിന്നും പക്ഷി സങ്കേതത്തിലെ ജനവാസ മേഖലയുടെ ബൗണ്ടറി മാപ്പ് അംഗീകരിച്ചിട്ടുളളതും കേന്ദ്ര ഗവണ്‍മെന്റിന്റെ അംഗീകാരത്തിനായി സര്‍വ്വെ മാപ്പ് തയ്യാറാക്കുവാന്‍ വനം വകുപ്പിന്റെ തന്നെ ഡെപ്യൂട്ടി ഡയറക്ടര്‍,മിനി സര്‍വ്വെ,കോഴിക്കോട്‌ ടീമിന്റെ സഹായം അഭ്യർത്ഥിച്ചിട്ടുളളതുമാണെന്ന്‌ ബന്ധപ്പെട്ട വനം വകുപ്പ് ഉദ്യോഗസ്ഥര്‍ അറിയിച്ചു.പ്രകൃതിക്ഷോഭം മൂലവും വന്യമൃഗശല്യം മൂലവും ഉണ്ടായ കൃഷി നാശത്തിനുള്ള നഷ്ട പരിഹാരം ദ്രുതഗതിയില്‍ നല്‍കുന്നതിന്‌ എം എല്‍ എ നിര്‍ദ്ദേശം നല്‍കി.
അന്‍പതു ലക്ഷത്തി അന്‍പത്തിരണ്ടായിരത്തി നാനൂറ്‌ രൂപയുടെ കൃഷി നാശം തിട്ടപ്പെടുത്തി ജില്ലാ ഓഫീസിലേയ്ക്ക്‌ റിപ്പോര്‍ട്ട്‌ ചെയ്തിട്ടുളളതാണെന്ന്‌ കൃഷി വകുപ്പ് ഉദ്യോഗസ്ഥര്‍ അറിയിച്ചു.താലൂക്കിലെ വിവിധ പഞ്ചായത്തുകളിലെ നിലവിലെ കുടിവെള്ള പ്രശ്‌നങ്ങള്‍ യോഗം ചര്‍ച്ച ചെയ്തു.നിലവില്‍ കുടിവെള്ള വിതരണം കാര്യക്ഷമമായി നടക്കുന്നുണ്ടെന്ന്‌ വാട്ടര്‍ അതോറിറ്റി അധികൃതര്‍ അറിയിച്ചു.ഇടമലയാര്‍ സ്‌കൂളില്‍ ഉണ്ടായ കാട്ടാന ശല്യത്തെക്കുറിച്ചും താലൂക്കിലെ വിവിധ സ്ഥലങ്ങളില്‍ ഈയിടെയായി ഉണ്ടാകുന്ന വന്യജീവി ശല്യത്തെക്കുറിച്ചും യോഗം ചര്‍ച്ച ചെയ്തു.ഫെന്‍സിങ്‌ മെയിന്റനന്‍സ്‌ നടത്തുന്നതിന്‌ നടപടികള്‍ സ്വീകരിച്ചിട്ടുണ്ടെന്നും നിലവിലെ സ്ഥിതി നിയന്ത്രണ വിധേയവുമാണെന്ന്‌ വനം വകുപ്പ് അധികൃതര്‍ അറിയിച്ചു.ട്രാഫിക്‌ പരിഷ്കാരങ്ങൾ കൂടുതല്‍ ഊര്‍ജ്ജസ്വലമാക്കണ മെന്നും കെ എസ് ആര്‍ ടി സി,പ്രൈവറ്റ്‌ ബസുകള്‍ നിയമങ്ങൾ കര്‍ശനമായി പാലിക്കണമെന്നും യോഗം നിര്‍ദ്ദേശം നല്‍കി.
മുന്‍സിപ്പല്‍ ചെയര്‍മാന്‍ കെ കെ ടോമി,ജില്ലാ പഞ്ചായത്ത്‌ മെമ്പര്‍ റാണിക്കുട്ടി ജോര്‍ജ്ജ്‌,നഗരസഭ വികസനകാര്യ സ്റ്റാൻഡിങ് കമ്മിറ്റി ചെയര്‍മാന്‍ കെ എ നൗഷാദ്‌,വിവിധ രാഷ്ട്രീയ പാര്‍ട്ടി പ്രതിനിധികള്‍,തഹസില്‍ദാര്‍ റെയ്ച്ചൽ കെ വര്‍ഗ്ഗീസ്‌,വിവിധ വകുപ്പ് മേധാവികൾ എന്നിവര്‍ യോഗത്തില്‍ പങ്കെടുത്തു.
