കൊച്ചി : ബ്രഷ് കൊണ്ട് ക്യാൻവാസിൽ വർണ്ണ വസന്തം ഒരുക്കിയ ഇന്ദ്രജിത് ഡാവിഞ്ചി എന്ന കുട്ടിക്കലാകാരൻ വീണ്ടും തരംഗം സൃഷിക്കുകയാണ്. ഇത്തവണ കണ്ണിൽ കണ്ട സാധനങ്ങളെല്ലാം നൂലിൽ കെട്ടിത്തൂക്കി ഇന്ദ്രജിത്ത് ഡാവിഞ്ചി ഒരുക്കിയതാകട്ടെ പോർച്ചുഗൽന്റെ സൂപ്പർ ഫുട്ബോൾ താരം ക്രിസ്റ്റിയാനോ റൊണാൾഡോയുടെ ചിത്രമാണ്.
പലവിധ സാധങ്ങൾ ഒരു നിശ്ചിത അകലത്തിൽ നൂലിൽ പല അളവുകളിലായി മുകളിൽ സ്ഥാപിച്ച ഗ്രിൽ കമ്പിയിൽ കെട്ടിയിട്ടാണ് ഫുട്ബോൾ താരം ക്രിസ്റ്റീനോ റൊണാൾഡോയുടെ ചിത്രമൊരുക്കിയിരിക്കുന്നത്.ത്രീഡി ഇല്ലൂഷൻ പൊലെ ഒരു വ്യൂ പോയൻ്റിൽ വരുമ്പോൾ മാത്രമാണ് യഥാർത്ഥ ചിത്രം തെളിയുക. പത്തു ദിവസം ഒഴിവു സമയങ്ങളിലായി തയ്യാറാക്കിയതാണ് കൊടുങ്ങല്ലൂർ അമൃത വിദ്യാലയത്തിലെ പ്ളസ് വൺ വിദ്യാർത്ഥിയായ ഇന്ദ്രജിത്ത്.
തറയിൽ തൊടാതെ നൂലുകളിൽ തൂങ്ങിക്കിടക്കുന്ന രീതിയിൽ ഇത് ഒരുക്കാൻ കുപ്പിയും, പാട്ടയും, കല്ലും, കമ്പിയും അടങ്ങുന്ന നിരവധി സാധനങ്ങൾ ആണ് ഇതിനായി ഉപയോഗിച്ചത്. വ്യത്യസ്തമായ രീതിയിൽ ഉള്ള ചിത്രങ്ങൾ ഇന്ദ്രജിത്ത് ഇതിന് മുൻപും ഒരുക്കി കാണികളെ വിസ്മയിപ്പിച്ചിട്ടുണ്ട് . കൈ വിരൽ ഉപയോഗിച്ച് ടോവിനോ തോമസിനെയും,കാൽ വിരൽ ഉപയോഗിച്ച് തമിഴ് സൂപ്പർ താരം വിജയിയെയും,ചുണ്ട് ഉപയോഗിച്ച് മലയാളത്തിന്റെ നടന വിസ്മയം മോഹൻലാലിനെയും, മൂക്ക് കൊണ്ട് തമിഴ് താരം സൂര്യയെയും വരച്ചു ജനമനസുകളിൽ ചേക്കേറിയതാണ് ഈ കൊച്ചു കലാപ്രതിഭ.
ബ്രഷ്, കൈ, കാൽ, ചുണ്ട്, മൂക്ക് എന്നിവ വരക്കാനുള്ള ആയുധമാക്കി പരീക്ഷണങ്ങളിൽ ഏർപ്പെടാറുള്ള ഇന്ദ്രജിത് ഇത്തവണ നൂലിലാണ് തന്റെ പരീക്ഷണം നടത്തിയത്.
മൂക്ക് കൊണ്ട് സൂര്യയെ വരച്ചതും,ചുണ്ടുകൾ കൊണ്ട് മോഹൻലാലിനെ വരച്ചതും വലിയ വാർത്തയായിരുന്നു. സൂര്യ ട്വിട്ടറിൽ ഷേയർ ചെയ്യുകയും,മോഹൻലാൽ ഫോണിൽ വിളിച്ച് അഭിനന്ദിക്കുകയും ചെയ്തിരുന്നു. പ്രശസ്ത ശില്പിയും, ചിത്രകാരനുമായ ഡാവിഞ്ചി സുരേഷിന്റെ മകനാണ് കലാലോകത്ത് അത്ഭുതങ്ങൾ സൃഷ്ട്ടിക്കുന്ന ഈ കുട്ടി പ്രതിഭ.
