കോതമംഗലം : കാർഷിക മേഖലയിലെ വന്യ ജീവികളുടെ ആക്രമണം തടയുവാൻ സർക്കാർ മുൻ കൈ എടുത്ത് ശാശ്വത പരിഹാരം ഉണ്ടാക്കണമെന്ന് കേരള കോൺഗ്രസ് യൂത്ത് ഫ്രണ്ട്(എം ) സംസ്ഥാന പ്രസിഡന്റ് അഡ്വ. റോണി മാത്യു. കർഷകരുടെ കൃഷിഭൂമിയിലേക്ക് കടന്നുകയറിയുള്ള വന്യമൃഗങ്ങളുടെ ആക്രമണം വന്തോതില് വര്ധിക്കുകയാണ്. കോതമംഗലം താലൂക്കിലെ കോട്ടപ്പടി, കുട്ടമ്പുഴ, പിണ്ടിമന, കവളങ്ങാട് എന്നീ പഞ്ചായത്തുകൾ വന്യ ജീവി ശല്ല്യം നേരിടുകയാണ്. കാട്ടാനക്കു പുറമെ, കാട്ടു പന്നിയും ഇപ്പോൾ കോട്ടപ്പടിയിൽ പുലി സാന്നിധ്യം വരെ കണ്ടെത്തിയിരിക്കുകയാണ്.
കഴിഞ്ഞ ഏതാനും ദിവസങ്ങൾക്കു മുന്നേ വടക്കും ഭാഗം സെന്റ് ജോർജ് ഹോരേബ് യാക്കോബായ പള്ളിയുടെ ഗേറ്റും, ചുറ്റു മതിലും കാട്ടാനകൾ തകർത്തിരുന്നു. ഇതിന് പുറമെ മുട്ടത്തുപാറ എൽ പി സ്കൂൾന്റെ ഗേറ്റും, പ്രദേശത്തെ ഒരു വീടിന്റെ കാർ പോർച്ചിൽ കിടന്ന കാറിനെ വരെ കുത്തി നശിപ്പിച്ചണ് കാട്ടാന മടങ്ങിയത്. കഴിഞ്ഞ ദിവസം നേര്യമംഗലം ചെമ്പൻകുഴിയിലും നിരവധി ആളുകളുടെ കൃഷി വിളകൾ നശിപ്പിച്ചു.
നേര്യമംഗലത്ത് സ്ഥിതി ചെയ്യുന്ന ജില്ലാ കൃഷി തോട്ടത്തിൽ വരെ കയറിയാണ് കാട്ടനയും, പന്നിയും വിളകൾ നശിപ്പിക്കുന്നത്.മലയോരജില്ലകളില് വന്യമൃഗങ്ങളുടെ ആക്രമണം തുടര്ച്ചയായി ഉണ്ടാകുകയാണ്. ഇതിനാൽ കർഷകർ പൊറുതി മുട്ടി.തങ്ങൾ നട്ട് നനച്ചു വളർത്തി വിളവ് എടുക്കാറായ കാർഷിക ഉത്പന്നങ്ങൾ ഒറ്റ രാത്രി കൊണ്ടാണ് കാട്ടാന ഉൾപ്പെടെയുള്ള വന്യ ജീവികൾ ചവിട്ടി മെതിച്ചു നശിപ്പിക്കുന്നത്. ഇത് നോക്കി നിന്ന് കണ്ണീർ പൊഴിക്കാനല്ലാതെ കർഷകർക്ക് കഴിയുന്നില്ല.കര്ഷകരുടെ വിളവെടുക്കാറായ കൃഷി ഉത്പന്നങ്ങള് വന്യമൃഗങ്ങള് തകര്ക്കുന്നതോടെ വര്ഷങ്ങളായുള്ള തങ്ങളുടെ പ്രതീക്ഷതന്നെ നഷ്ടമാകുകയാണ്.
കൃഷി മാത്രം ഉപജീവനമാര്ഗമായുള്ള ജനങ്ങളുടെ കാര്ഷിക വിഭവങ്ങള് വന്യജീവികള് നശിപ്പിക്കുമ്പോള് പല കര്ഷകരും ആത്മഹത്യയുടെ തന്നെ വക്കിലാണ്. ഈ സാഹചര്യത്തില് വന്യ ജീവികളുടെ ആക്രമണത്തില് നിന്നും കര്ഷകരെ സംരക്ഷിക്കുന്നതിനായി കൂടുതല് വിപുലമായ പദ്ധതികള് സര്ക്കാര് ആസൂത്രണം ചെയ്യണമെന്നു കേരള കോൺഗ്രസ് യൂത്ത് ഫ്രണ്ട് (എം) സർക്കാരിനോട് ആവശ്യപ്പെട്ടു
