കോതമംഗലം : കോട്ടപ്പടി വടക്കുംഭാഗത്ത് കാട്ടാന ശല്യം രൂക്ഷം. ഇന്നലെ രാത്രിയിൽ പശുകിടാവിനെ കാട്ടാന അടിച്ചു കൊന്നു. വാവേലി ആലുങ്കൽ വീട്ടിൽ ജോണിന്റെ ഒരു മാസം മാത്രം പ്രായമുള്ള പശുക്കിടാവിനാണ് ദാരുണമായ അന്ത്യം സംഭവിച്ചത്. കാട്ടാന വരുന്നത് കണ്ട തള്ളപശു കയറ് പൊട്ടിച്ചു ഓടിയത് കൊണ്ട് മാത്രമാണ് കറവയുള്ള പശു രക്ഷപെട്ടത്. കിടാവിനെ തുമ്പികൈകൊണ്ട് ചുഴറ്റിയെടുത്തു എറിയുകയായിരുന്നു എന്നുവേണം അനുമാനിക്കാൻ എന്ന് സ്ഥലം സന്ദർശിച്ചവർ വ്യകതമാക്കുന്നു. ആനയുടെ എറിയലിന്റെ ശക്തിയിൽ തെങ്ങിൽ പോയി അടിക്കുകയും തുടർന്ന് ചവിട്ടി കൂട്ടിയ നിലയിലുമായിരുന്നു പശുക്കിടാവ്.
കെ.പി.സി.സി. ജനറൽ സെക്രട്ടറി അഡ്വ : മാത്യു കുഴൽനാടൻ, കോൺഗ്രസ് മണ്ഡലം പ്രസിഡന്റ് എം കെ എൽദോസ്, യൂത്ത് കോൺഗ്രസ് മണ്ഡലം പ്രിസിഡന്റ് ലിജോ ജോണി, ബ്ലോക്ക് ജനറൽ സെക്രട്ടറിമാരായ അനൂപ് കാസ്സിം, എ.കെ സജീവൻ, പഞ്ചായത്ത് അംഗങ്ങളായ ഷൈമോൾ ബേബി, ഷാന്റി എൽദോസ് തുടങ്ങിയവർ സ്ഥലം സന്ദർശിച്ചു. കഴിഞ്ഞ വർഷം ഇതേ രീതിയിൽ വാവേലിയിൽ പോത്തിനെ അടിച്ചു കൊന്നിരുന്നു, ജനങ്ങളുടെ പരിഭ്രാന്തിക്ക് ശാശ്വത പരിഹാരം കാണണം എന്ന് മാത്യു കുഴൽനാടൻ ആവശ്യപ്പെട്ടു. നാട്ടുകാരുടെ ജീവനോപാധികൾക്ക് സംരക്ഷണം ഒരുക്കുവാൻ സർക്കാർ ഇടപെടണമെന്നും, അടിയന്തിരമായി നഷ്ടപരിഹാരം ലഭ്യമാക്കുവാനുള്ള നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.
📲 Join Whatsapp Group..
