പെരുമ്പാവൂര്: കവര്ച്ച കേസ് പ്രതിയെ കാപ്പ ചുമത്തി ജയിലിലടച്ചു. മാറംപിള്ളി മുടിക്കല് തുകലില് ഉവൈസ് (40)നെയാണ് കാപ്പ ചുമത്തി വിയ്യൂര് സെന്ട്രല് ജയിലിലടച്ചത്. എറണാകുളം റൂറല് ജില്ലാ പോലീസ് മേധാവി കെ.എസ് സുദര്ശന്റെ റിപ്പോര്ട്ടിന്റെ അടിസ്ഥാനത്തില് ജില്ലാ കളക്ടര് പ്രിയങ്ക ജി. ആണ് ഉത്തരവിട്ടത്. പെരുമ്പാവൂര് പോലീസ് സ്റ്റേഷന് പരിധിയില് കവര്ച്ച, മോഷണം, തട്ടിക്കൊണ്ട് പോകല്, അടിപിടി തുടങ്ങി നിരവധി കേസുകളില് ഉള്പ്പെട്ടയാളാണ്.
കഴിഞ്ഞ ഫെബ്രുവരിയില് പെരുമ്പാവൂര് പ്രൈവറ്റ് ബസ് സ്റ്റാന്റിന് സമീപം ബംഗാള് സ്വദേശിയുടെ പോക്കറ്റില് നിന്നും മൊബൈല് ഫോണ് ബലമായി പിടിച്ചെടുക്കുവാന് ശ്രമിച്ചും, ഹെല്മെറ്റ് കൊണ്ട് ആക്രമിക്കുകയും ചെയ്തതിന് പെരുമ്പാവൂര് പോലീസ് രജിസ്റ്റര് ചെയ്ത കേസില് പ്രതിയായതിനെ തുടര്ന്നാണ് നടപടി.
പെരുമ്പാവൂര് പോലീസ് ഇന്സ്പെക്ടര് എല് അനില് കുമാര്, സബ്ബ് ഇന്സ്പെക്ടര്മാരായ ജോജോ ജോര്ജ്ജ്, ജോബി ജോര്ജ്ജ്, എസ്.എല് അര്ജ്ജുന്, അസി. സബ്ബ് ഇന്സ്പെക്ടര്മാരായ കെ.ആര് സുധീര്, എം.ബി സുബൈര്, സിവില് പോലീസ് ഓഫീസര് എ.കെ നജ്മി എന്നിവര് ചേര്ന്നാണ് പ്രതിയെ അറസ്റ്റ് ചെയ്തത്.
