കോതമംഗലം :കോതമംഗലം നഗരസഭയിൽ 5.25 കോടി രൂപ ചിലവഴിച്ചു കൊണ്ടുള്ള മോഡേൺ ക്രിമറ്റോറിയത്തിന്റെ നിർമ്മാണോദ്ഘാടനം മെയ് 31 ന് ബഹു.വ്യവസായ- നിയമ -വാണിജ്യ – കയർ വകുപ്പ് മന്ത്രി പി രാജീവ് നിർവഹിക്കുമെന്ന് ആന്റണി ജോൺ എം എൽ എയും, മുൻസിപ്പൽ ചെയർമാൻ കെ കെ ടോമിയും സംയുക്ത വാർത്താ സമ്മേളനത്തിൽ അറിയിച്ചു.
കോതമംഗലം നഗരസഭ പഞ്ചായത്തായിരുന്ന കാലം മുതൽ കോതമംഗലം നിവാസികളുടെയും, സമീപ പഞ്ചായത്തുകളിലെ ജനവിഭാഗങ്ങൾ ഉൾപ്പെടെ കോതമംഗലം നിയോജക മണ്ഡലത്തിലെ രണ്ട് ലക്ഷത്തോളം വരുന്ന പൊതുജനങ്ങളുടെ ഏറ്റവും മൗലീക ആവശ്യമായിരുന്ന പൊതു ശ്‌മശാനം ഇപ്പോൾ യാഥാർത്ഥ്യമാകാൻ പോകുകയാണ്.
മോഡേൺ ക്രിമറ്റോറിയത്തിന്റെ നിർമ്മാണത്തിനായി നാല് കോടി രൂപയുടെ പ്രോജക്ടിന് സർക്കാരിൻ്റെയും, കിഫ്‌ബിയുടെയും അനുമതിയും, അംഗീകാരവും ലഭിച്ച് ടെണ്ടർ നടപടികൾ പൂർത്തീകരിച്ചാണിപ്പോൾ നിർമ്മാണ പ്രവർത്തനങ്ങൾ ആരംഭിക്കുന്നത്.അതോടൊപ്പം എം.എൽ.എ. ഫണ്ടിൽ നിന്നും ഒരു കോടി രൂപ വകയിരുത്തി ക്രിമറ്റോറിയത്തിൻ്റെ ഭാഗത്തേക്കുള്ള റോഡുകളുടെ നവീകരണത്തിനുള്ള നടപടികളും പൂർത്തികരിച്ചിട്ടുണ്ട്. നഗരസഭ 2025-2026 വാർഷിക പദ്ധതിയിൽ ക്രിമറ്റോറിയത്തിൻ്റെ ചുറ്റു മതിൽ നിർമ്മാണത്തിനും 25 ലക്ഷം രൂപ വകയിരുത്തിയിട്ടുണ്ട്.
കോതമംഗലം നഗരസഭ 6-ാം വാർഡിൽ 65 സെൻ്റ് സ്ഥലത്ത് ഒരേ സമയം 2 മൃതദേഹങ്ങൾ സംസ്ക്കരിക്കാൻ കഴിയുന്ന വിധത്തിലും, ബന്ധുക്കൾക്ക് അവരുടെ ആചാര അനുഷ്ഠാന ങ്ങൾ പ്രകാരമുള്ള കർമ്മങ്ങൾ നടത്തുന്നതിനുള്ള സൗകര്യത്തോടും കൂടിയ ആധുനിക ഗ്യാസ് ക്രിമറ്റോറിയമാണ് നിർമ്മി ക്കുന്നത്.
പദ്ധതിയുടെ നിർമ്മാണോദ്ഘാടനം മെയ് 31 ശനിയാഴ്ച വൈകിട്ട് 4.30 ന് മുനിസിപ്പൽ ഓഫീസിന് സമീപം വച്ച് ബഹു. വ്യവസായ- നിയമ-വാണിജ്യ- കയർ വകുപ്പ് മന്ത്രി പി രാജീവ് നിർവഹിക്കുമെന്ന് ആന്റണി ജോൺ എംഎൽഎയും മുൻസിപ്പൽ ചെയർമാൻ കെ കെ ടോമിയും സംയുക്ത വാർത്താ സമ്മേളനത്തിൽ അറിയിച്ചു.പതിറ്റാണ്ടുകളായി കോതമംഗലത്തിന്റെ പൊതു സമൂഹം ഉന്നയിച്ചു വരുന്ന പ്രധാന ആവശ്യം ഇപ്പോൾ യാഥാർത്ഥ്യമാക്കാൻ കഴിഞ്ഞതിൽ ഏറെ സന്തോഷമുണ്ടെന്നും, നിർമ്മാണ പ്രവർത്തനങ്ങൾ സമയബന്ധിതമായി പൂർത്തീകരിക്കുമെന്നും ഇരുവരും കൂട്ടിച്ചേർത്തു.
വാർത്താ സമ്മേളനത്തിൽ മുനിസിപ്പൽ വൈസ് ചെയർപേഴ്സൺ സിന്ധു ഗണേശൻ,സ്റ്റാൻഡിങ് കമ്മിറ്റി ചെയർമാൻമാരായ കെ എ നൗഷാദ്,കെ വി തോമസ്, രമ്യ വിനോദ്, ആറാം വാർഡ് കൗൺസിലർ സിജോ വർഗീസ് എന്നിവരും പങ്കെടുത്തു.
