കോതമംഗലം : ഇരുമലപ്പടി സ്വദേശിയെ കാറിടിപ്പിച്ച് വീഴ്ത്തിയശേഷം വധിക്കാൻ ശ്രമിച്ച കേസിൽ അഞ്ച് പേർ അറസ്റ്റിൽ. അശമന്നൂർ തെക്കേപ്പാലേലി വീട്ടിൽ വിപിൻ (36), അശമന്നൂർ നൂലേലി മന്ത്രിക്കൽ ജിജോ (30),നൂലേലി ഇടത്തോട്ടിൽ വീട്ടിൽ മഹേഷ് (42), നൂലേലി പൊക്കാപ്പറമ്പത്ത് വീട്ടിൽ അനന്തകൃഷ്ണൻ (ശ്യാം 28), നൂലേലി കുന്നുമ്മേൽ വീട്ടിൽ അരുൺ ചന്ദ്രൻ (കണ്ണൻ 38 ) എന്നിവരെയാണ് കോതമംഗലം പോലീസ് അറസ്റ്റ് ചെയ്തത്. കഴിഞ്ഞ ജൂലൈയിൽ രാതി ഇളമ്പ്ര പാലായത്ത് കാവ് ജംഗ്ഷനിൽ വച്ച് ഇരുമലപ്പടി സ്വദേശി അഷ്റഫിന് നേരെയാണ് ആക്രമണമുണ്ടായത്.
അഷ്റഫ് ഇടനില നിന്ന് വാഹനം പണയത്തിന് നൽകിയതുമായി ബന്ധപ്പെട്ട തർക്കമാണ് വധശ്രമത്തിൽ കലാശിച്ചത്. ബൈക്കിൽ യാത്ര ചെയ്യുകയായിരുന്ന അഷ്റഫിനെ പിക്കപ്പ് വാഹനത്തിലെത്തിയ സംഘം ഇടിച്ച് വീഴ്ത്തിയശേഷം ആക്രമിക്കുകയായിരുന്നു. തുടർന്ന് ഒളിവിൽപ്പോയ സംഘത്തെ തെങ്കാശിയിൽ നിന്നുമാണ് പിടികൂടിയത്. അന്വേഷണ സംഘത്തിൽ എസ്.ഐ മാരായ മാഹിൻ സലിം, സി.എം.മുജീബ് സി.പി.ഒമാരായ പി.എം.അജിംസ്, സനൽ.വി.കുമാർ തുടങ്ങിയവരാണ് ഉണ്ടായിരുന്നത്.
