കോതമംഗലം: പൂക്കളമൊരുക്കിയും വർണാഭമായ സാംസ്കാരിക ഘോഷയാത്രയുമായി പൊളിഓണം 2026 ന് കോതമംഗലത്ത് തുടക്കമായി. ഷിബു തെക്കുംപുറം എംഎൽഎയുടെ നേതൃത്വത്തിൽ തദ്ദേശ സ്വയംഭരണ സ്ഥാപനങ്ങളുടെയും വിവിധ സംഘടനകളുടെയും സഹകരണത്തോടെ സംഘടിപ്പിക്കുന്ന ഓണാഘോഷത്തിന്റെ ഔദ്യോഗിക ഉദ്ഘാടനം മന്ത്രി അഡ്വ. വി.ഇ. അബ്ദുൾ ഗഫൂർ നിർവഹിച്ചു.
ശനിയാഴ്ച
രാവിലെ കോതമംഗലം കെഎസ്ആർടിസി ബസ് സ്റ്റാൻഡ് പരിസരത്ത് ഒരുക്കിയ മെഗാ പൂക്കളം ഓണാഘോഷത്തിന് നിറപ്പകിട്ടേകി. കെഎസ്ആർടിസി ജീവനക്കാർ, ശോഭന ഇംഗ്ലീഷ് മീഡിയം ഹൈസ്കൂൾ വിദ്യാർഥികൾ, അങ്കണവാടി അധ്യാപകർ,നെല്ലിക്കുഴി ദയ ബഡ്സ് സ്കൂൾ, ധർമ്മഗിരി നേഴ്സിംഗ് സ്കൂൾ എന്നിവരുടെ സഹകരണത്തോടെയാണ് മെഗാ പൂക്കളം ഒരുക്കിയത്.
ഉച്ചയ്ക്ക് കോതമംഗലം നഗരസഭാ പരിസരത്തുനിന്ന് ആരംഭിച്ച സാംസ്കാരിക ഘോഷയാത്ര ജനപങ്കാളിത്തം കൊണ്ട് ശ്രദ്ധേയമായി. മുത്തുക്കുടകളുടെയും വിവിധ കലാരൂപങ്ങളുടെയും അകമ്പടിയോടെ നടന്ന ഘോഷയാത്ര നഗരവീഥികളെ ഓണാഘോഷത്തിന്റെ ആവേശത്തിലാഴ്ത്തി. പഞ്ചവാദ്യം, കാവടി, ശിങ്കാരിമേളം, ബാൻഡ്സെറ്റ്, കൈകൊട്ടിക്കളി തുടങ്ങിയ കലാരൂപങ്ങൾ ഘോഷയാത്രയ്ക്ക് മാറ്റുകൂട്ടി. കെഎസ്ആർടിസി ബസ് സ്റ്റാൻഡ് പരിസരത്ത് ഘോഷയാത്ര സമാപിച്ചു.
തുടർന്ന് കെഎസ്ആർടിസി ബസ് സ്റ്റാൻഡ് പരിസരത്ത് നടന്ന സമ്മേളനത്തിൽ മന്ത്രി അഡ്വ. വി.ഇ. അബ്ദുൾ ഗഫൂർ പൊളിഓണം 2026 ഉദ്ഘാടനം ചെയ്തു. ഡീൻ കുര്യാക്കോസ് എംപി, സിനിമാതാരം മിയ ജോർജ് എന്നിവർ മുഖ്യാതിഥികളായി. കെ.പി ബാബു, ഷമീർ പനക്കൻ, ബാബു ഏലിയാസ്, എം.എസ് എൽദോസ്, ഇബ്രാഹിം കവല, പി. കെ മൊയ്തു, മുഹമ്മദ് ഇഖ്ബാൽ, ബ്ലോക്ക് പഞ്ചായത്ത് പ്രസിഡന്റ് ജെസ്സി സാജു, കുട്ടമ്പുഴ പഞ്ചായത്ത് പ്രസിഡന്റ് മേരി കുര്യാക്കോസ്, ജില്ലാ പഞ്ചായത്ത് അംഗങ്ങളായ ജോമി തെക്കേക്കര, പി.എ.എം ബഷീർ, ബ്ലോക്ക് പഞ്ചായത്ത് മുൻ പ്രസിഡൻ്റ് കെ.ഐ ജേക്കബ്, ബാബു പോൾ, എൻ. സി ചെറിയാൻ എന്നിവർ പ്രസംഗിച്ചു.വൈകുന്നേരം ഭൂതത്താൻകെട്ടിൽ ഒരുക്കിയ ലൈറ്റ് ഇലൂമിനേഷനും ഓണാഘോഷത്തിന്റെ മോടി കൂട്ടി. ഭൂതത്താൻകെട്ടിന്റെ ദൃശ്യ തിഭംഗിക്ക് കൂടുതൽ തിളക്കം പകരുന്ന തരത്തിൽ ഒരുക്കിയ ദീപാലങ്കാരങ്ങൾ സ്വിച്ച് ഓൺ ചെയ്തതോടെ പ്രദേശം വർണവെളിച്ചത്തിൽ മുങ്ങി.
മഡ് റേസ് ഞായറാഴ്ച
പൊളിഓണം 2026ന്റെ ഭാഗമായി ഇന്ന് രാവിലെ 10ന് ഭൂതത്താൻകെട്ടിൽ ജെൻസി റേസ് മഡ് റേസ് നടക്കും. വിവിധ വിഭാഗങ്ങളിലായി നൂറോളം വാഹനങ്ങൾ മത്സരത്തിൽ പങ്കെടുക്കും. ഓഫ് റോഡ് പ്രേമികൾക്കും കാണികൾക്കും ആവേശം പകരുന്ന തരത്തിലാണ് മത്സരം ഒരുക്കിയിരിക്കുന്നത്.
ഒരാഴ്ചയിലേറെ നീളുന്ന പൊളിഓണം 2026ന്റെ ഭാഗമായി കലാ-സാംസ്കാരിക പരിപാടികൾ, വിവിധ മത്സരങ്ങൾ, വിനോദ പരിപാടികൾ എന്നിവയും നടക്കും. കുട്ടികൾ മുതൽ മുതിർന്നവർ വരെയുള്ളവർക്ക് പങ്കെടുക്കാനും ആസ്വദിക്കാനും കഴിയുന്ന തരത്തിലാണ് പരിപാടികൾ ക്രമീകരിച്ചിരിക്കുന്നത്. നിയോജകമണ്ഡലത്തിലെ വിവിധ തദ്ദേശ സ്വയംഭരണ സ്ഥാപനങ്ങളെയും സംഘടനകളെയും ഒരുമിപ്പിച്ച് ഓണത്തിന്റെ കൂട്ടായ്മയും സൗഹൃദവും ആഘോഷമാക്കുകയാണ് പൊളിഓണം 2026ന്റെ ലക്ഷ്യം.
