കോതമംഗലം : കഴിഞ്ഞ രണ്ടുമാസമായി കീരംപാറ പഞ്ചായത്തിലെ വിവിധ റേഷൻകടകളിൽ വിതരണത്തിന് എത്തുന്ന അരി കറുത്ത നിറത്തിലുള്ള ചവലഅരി ആണെന്ന് ആക്ഷേപം. ഈ അരി ഉപയോഗിച്ച് കഞ്ഞി വെച്ചാൽ കൈപ് രുചിയും, ഇത് കഴിച്ചാൽ വയറുവേദനയും വയറ്റിളക്കവും വരെ ഉണ്ടാക്കുന്നതായി കീരംപാറ പഞ്ചായത്തിലെ പുന്നേക്കാട് മേഖലയിലെ ജനങ്ങൾ പരാതി പറയുന്നു. ഇനി റേഷൻ കടയിൽ നിന്ന് കിട്ടുന്ന വെള്ളയരി ആകട്ടെ പൊടി നിറഞ്ഞതുംഎന്ന് ആക്ഷേപം ഉയരുന്നു. സൗജന്യമായി കിട്ടുന്നതുകൊണ്ട് ആരും പ്രതികരിക്കാറില്ലയെന്നും നാട്ടുകാർ പറയുന്നു. അതുകൊണ്ട് വീണ്ടും വീണ്ടും കീരംപാറ പഞ്ചായത്തിലേക്ക് ഈവിധത്തിലുള്ള അരി വിതരണത്തിനായി എത്തുന്നു എന്നാണ് ഇവരുടെ പരാതി.
ഭക്ഷ്യയോഗ്യമല്ലാത്ത അരി വിതരണം അവസാനിപ്പിക്കണമെന്നും, അധികാരികൾ പാവങ്ങളോട് ഈ കാര്യത്തിലെങ്കിലും കരുണ കാണിക്കണമെന്നുമാണ് ഇവരുടെ ആവശ്യം. ഭക്ഷ്യ സുരക്ഷ ഉദ്യോഗസ്ഥർ ഈ മോശം അരി മാറ്റി പകരം ഭക്ഷ്യ യോഗ്യമായ നല്ല അരി വിതരണം ചെയ്യണമെന്നും അല്ലാത്ത പക്ഷം കീരംപാറ ജനകിയ വേദിയുടെ ആഭിമുഖ്യത്തിൽ പ്രക്ഷോഭ സമരം ആരംഭിക്കുമെന്ന് ജനകിയ വേദി പ്രസിഡന്റ് ജോളി ഐസക്കും, കീരംപാറ പഞ്ചായത്ത്‌ മൂന്നാം വാർഡ് മെമ്പർ മാമച്ചൻ ജോസഫ് പറഞ്ഞു.
