കോതമംഗലം: കീരംപാറ പഞ്ചായത്തിലെ ജനവാസ മേഖലയായ കൂരികുളത്ത് ഇന്ന് പുലർച്ചെ കാട്ടാനക്കൂട്ടം വ്യാപകമായി കൃഷിയിടങ്ങൾ നശിപ്പിച്ചു. കൂരികുളം സ്വദേശി എർത്തടത്തിൽ തോമസ്, ഞവണാംകുഴി ജോസ്, ബേബി എന്നിവരുടെ കൃഷിയിടങ്ങളാണ് നശിപ്പിച്ചത്. വാഴ, തെങ്ങ്, ജാതി, കപ്പ, വിവിധ ഫലവൃക്ഷങ്ങൾ എന്നിവ തിന്നും ചവിട്ടി മെതിച്ചും നശിപ്പിച്ചു.
തട്ടേക്കാട്, തുണ്ടം വനങ്ങളിൽ നിന്ന് പതിവായി ആനകൾ ഈ മേഖല കളിൽ എത്തുന്നുണ്ടെങ്കിലും ഈ കൃഷിയിടത്തിൽ ആദ്യമായാണ് ആനകൾ എത്തുന്നത്. ഫെൻസിംഗുകൾ തകർത്ത് പുതിയ മേച്ചിൽപ്പുറങ്ങളിൽ ആനകൾ എത്തിയതോടെ ജനങ്ങൾ ആശങ്കയിലായി. കൃഷികൾ വ്യാപകമായി നശിപ്പിച്ചിട്ടുണ്ടെന്നും വന്യമൃഗശല്യത്തിൽ നിന്ന് ശാശ്വത പരിഹാരം ഉണ്ടാകണമെന്നും സ്ഥലമുടമകൾ ആവശ്യപ്പെട്ടു.
