മൂവാറ്റുപുഴ: ചെറുപ്രായത്തില്‍ തന്നെ സ്പ്രിന്റ് ട്രയാത്ലോണില്‍ ശ്രദ്ധേയമായ നേട്ടങ്ങള്‍ കൈവരിച്ച കേരളത്തില്‍ നിന്നുള്ള യുവ കായികതാരങ്ങളായ ജോനാഥന്‍ കെ. പൗലോസും മിഷേല്‍ ആന്‍ കുരുവിളയും ദേശീയ റെക്കോര്‍ഡ് അംഗീകാരം ലക്ഷ്യമിടുന്നു. 2026 മെയ് മാസത്തില്‍ നടന്ന ട്രൈ2ചാമ്പ്‌സ് ചെന്നൈ ട്രയാത്ലോണില്‍ ഇരുവരും 750 മീറ്റര്‍ കടല്‍നീന്തല്‍, 20 കിലോമീറ്റര്‍ സൈക്ലിംഗ്, 5 കിലോമീറ്റര്‍ ഓട്ടം എന്നിവ ഉള്‍പ്പെടുന്ന സ്പ്രിന്റ് ട്രയാത്ലോണ്‍ വിജയകരമായി പൂര്‍ത്തിയാക്കി. മത്സരത്തില്‍ മിഷേല്‍ ജൂനിയര്‍ വനിതാ വിഭാഗത്തില്‍ ഒന്നാം സ്ഥാനം നേടി. വെറും എട്ടാം വയസ്സില്‍ ജോനാഥന്‍ തന്റെ ആദ്യ സ്പ്രിന്റ് ട്രയാത്ലോണ്‍ പൂര്‍ത്തിയാക്കി ശ്രദ്ധേയനായി.
2026 ഒക്ടോബറില്‍ നടന്ന തൃശൂര്‍ ട്രയാത്ലോണിന്റെ നാലാം പതിപ്പിലും ഇരുവരും പങ്കെടുത്തു. ഏകദേശം ഒന്നര മാസത്തെ നീന്തല്‍ക്കുളം പരിശീലനവും റോഡിലെ സൈക്ലിങ്, ഓട്ടം പരിശീലനവും പൂര്‍ത്തിയാക്കിയ ശേഷമാണ് ഇവര്‍ മത്സരത്തിനെത്തിയത്.”പൂര്‍ണ സ്പ്രിന്റ് ട്രയാത്ലോണ്‍ പൂര്‍ത്തിയാക്കിയ ഏറ്റവും പ്രായം കുറഞ്ഞ ഇന്ത്യന്‍ പുരുഷ താരം” എന്ന റെക്കോര്‍ഡ് അംഗീകാരമാണ് ജോനാഥന്‍ ലക്ഷ്യമിടുന്നത്. ”പൂര്‍ണ സ്പ്രിന്റ് ട്രയാത്ലോണ്‍ പൂര്‍ത്തിയാക്കിയ ഏറ്റവും പ്രായം കുറഞ്ഞ ഇന്ത്യന്‍ വനിതാ താരം” എന്ന അംഗീകാരമാണ് മിഷേലിന്റെ ലക്ഷ്യം.മൂവാറ്റുപുഴ വെള്ളൂര്‍ക്കുന്നം സ്വദേശികളായ കോട്ടക്കുടി കിച്ചൂ കുരുവിളയുടെയും മറിയാമ്മ ബേബിയുടെയും മക്കളാണ് ഇവര്‍. വാഴക്കുളം ചാവറ ഇന്റര്‍നാഷണല്‍ അക്കാദമിയിലെ വിദ്യാര്‍ഥികളായ മിഷേല്‍ ഏഴാം ക്ലാസിലും ജോനാഥന്‍ നാലാം ക്ലാസിലുമാണ് പഠിക്കുന്നത്.
ചെറുപ്രായത്തില്‍ തന്നെ കഠിനമായ കായിക വെല്ലുവിളികള്‍ ഏറ്റെടുത്ത് മുന്നേറുന്ന ഇവരുടെ നേട്ടങ്ങള്‍ മറ്റു കുട്ടികള്‍ക്കും പ്രചോദനമാണ്. കായികരംഗത്തോടുള്ള സമര്‍പ്പണവും ആത്മവിശ്വാസവും പ്രകടിപ്പിക്കുന്ന സഹോദരങ്ങള്‍ കൂടുതല്‍ കുട്ടികളെ ആരോഗ്യകരമായ ജീവിതശൈലിയിലേക്കും കായികപ്രവര്‍ത്തനങ്ങളിലേക്കും ആകര്‍ഷിക്കുമെന്ന പ്രതീക്ഷയിലാണ്.ദേശീയ റെക്കോര്‍ഡ് അംഗീകാരത്തിനായുള്ള നിര്‍ദിഷ്ട അവകാശവാദങ്ങള്‍ ബന്ധപ്പെട്ട റെക്കോര്‍ഡ് അംഗീകാര സ്ഥാപനത്തിന്റെ പരിശോധനയ്ക്കും അംഗീകാരത്തിനും വിധേയമാണ്.
