കോതമംഗലം: വർഷങ്ങളായി നീണ്ടുനിന്ന പ്രതിസന്ധികൾക്ക് വിരാമമിട്ട് കുടമുണ്ട പുതിയപാലം വ്യാഴാഴ്ച രാവിലെ 9.30ന് ഗതാഗതത്തിന് ഷിബു തെക്കുംപുറം എംഎൽഎ തുറന്ന് കൊടുക്കും.അപ്രോച്ച് റോഡ് നിർമാണത്തിനാവശ്യമായ ഭൂമി സ്ഥലമുടമ സൗജന്യമായി വിട്ടുനൽകാൻ തയ്യാറായതോടെയാണ് പാലം ഗതാഗതയോഗ്യമാക്കുന്നതിനുള്ള തടസ്സങ്ങൾ നീങ്ങിയത്.
അടിവാട് – കുത്തുകുഴി റോഡിൽ കോതമംഗലം പുഴക്ക് കുറുകെ പഴയ പാലത്തിന് ചേർന്ന് സമാന്തരമായി ഉയരം കൂട്ടിയാണ് പുതിയ കുടമുണ്ട പാലം നിർമ്മിച്ചിട്ടുള്ളത്.കവളങ്ങാട് പഞ്ചായത്തിനെ വാരപ്പെട്ടി, പല്ലാരിമംഗലം പഞ്ചായത്തുകളുമായി ഒരേ സമയം ബന്ധിക്കുന്നതുമാണ് പാലം.
കുടിവെള്ളക്ഷാമം പരിഹരിക്കുന്നതിനും ജലസേചന, ഗതാഗത സൗകര്യങ്ങൾ മെച്ചപ്പെടുത്തുന്നതിനുമായി വിഭാവനം ചെയ്ത പദ്ധതിയാണിത്. ഭൂമിയുമായി ബന്ധപ്പെട്ട തർക്കങ്ങളും തുടർനടപടികളിലെ കാലതാമസവും കാരണം നിർമാണം നീണ്ടുപോയിരുന്നു. പിന്നീട് സ്ഥലമുടമയുടെ സഹകരണത്തോടെ ഭൂമി വിട്ടുനൽകുന്നതിനുള്ള നടപടികൾ പൂർത്തിയാക്കി, ആവശ്യമായ അനുമതികളോടെ അപ്രോച്ച് റോഡിന്റെ നിർമാണവും പൂർത്തീകരിച്ചു. പാലം തുറന്നുകൊടുക്കുന്നതോടെ പ്രദേശവാസികളുടെ യാത്രാക്ലേശത്തിന് ആശ്വാസമാകും.
സമാന്തര ഉദ്ഘാടനം നടത്തി.
എന്നാൽ മുൻ എംഎൽഎ ആന്റണി ജോണിന്റെ നേതൃത്വത്തിൽ ഇന്നലെ വൈകുന്നേരം പാലത്തിൽ സമാന്തര ഉദ്ഘാടനം നടത്തി. അടിവാട്-കുത്തുകുഴി റോഡിൽ കോതമംഗലം പുഴയ്ക്കു കുറുകെയുള്ള പഴയ പാലത്തിൽ മഴക്കാലത്തു പതിവായി വെള്ളം കയറി ഗതാഗതം മുടങ്ങുന്നതിനാലാണു സമാന്തരമായി ഉയർത്തി ജലസേചനവകുപ്പ് പാലവും തടയണയും ചേർത്തു നിർമിച്ചത്. 2014ൽ ടി.യു. കുരുവിള എംഎൽഎയായിരുന്നപ്പോൾ തുടങ്ങിയ പാലം നിർമാണം 2016ൽ പൂർത്തീകരിച്ചെങ്കിലും വാരപ്പെട്ടി-പല്ലാരിമംഗലം ഭാഗത്തെ അപ്രോച്ച് റോഡ് നിർമാണം തർക്കത്തിൽ കുടുങ്ങിയതിനാലാണു പാലം തുറക്കൽ വൈകിയത്. സ്ഥലമുടമ സൗജന്യമായി ഭൂമി വിട്ടുനൽകിയതോടെയാണ് അപ്രോച്ച് റോഡ് നിർമിച്ചു തടസ്സം നീക്കാനായത്. അപ്രോച്ച് റോഡിനു സ്‌ഥലം കയ്യേറിയെന്ന തർക്കം തുടർന്നപ്പോൾ എംഎൽഎയായിരുന്ന താൻ ഇടപെട്ടാണു പരിഹാരമുണ്ടാക്കിയതെന്നും എന്നാൽ, അപ്രോച്ച് റോഡ് സാധ്യമാക്കി പാലം സഞ്ചാരയോഗ്യമാക്കിയത് ഷിബു തെക്കുംപുറം എംഎൽഎയാണെന്നു ജനങ്ങളെ തെറ്റിദ്ധരിപ്പിക്കാൻ ശ്രമിക്കുകയാണെന്നും ആന്റണി ജോൺ വാർത്താക്കുറുപ്പിൽ പറഞ്ഞു. ഇതിൽ പ്രതിഷേധിച്ചാണു ജനകീയ ഉദ്ഘാടനമെന്ന പേരിൽ ബുധനാഴ്ച ആന്റണി ജോൺ ഉദ്ഘാടനം നടത്തിയത്.
