കോതമംഗലം: കേരളപ്പിറവിയുടെ 70-ാം വാർഷികത്തോടനുബന്ധിച്ച് കോതമംഗലത്ത് വിവിധ പരിപാടികളോടെ വിപുലമായ ആഘോഷം സംഘടിപ്പിക്കുന്നു. മലയാളത്തിന്റെ തനിമയും കോതമംഗലത്തിന്റെ കലാ-സാംസ്കാരിക പൈതൃകവും പുതുതലമുറയ്ക്ക് പരിചയപ്പെടുത്തുകയും നാടിന്റെ സാംസ്കാരിക ചൈതന്യം ലോകത്തിനു മുന്നിൽ അവതരിപ്പിക്കുകയുമാണ് ലക്ഷ്യം. ഷിബു തെക്കുംപുറം എംഎൽഎയുടെ നേതൃത്വത്തിലാണ് ആഘോഷ പരിപാടികൾ സംഘടിപ്പിക്കുന്നത്.
കേരളപ്പിറവി ദിനത്തിൽ രാവിലെ 10 മുതൽ ഉച്ചയ്ക്ക് ഒന്നു വരെ കോതമംഗലം കലാ ഓഡിറ്റോറിയത്തിൽ നടക്കുന്ന ചടങ്ങിൽ വിവിധ തദ്ദേശസ്ഥാപനങ്ങളുടെ സഹകരണത്തോടെ തനത് കലാരൂപങ്ങളുടെ അവതരണം, ഓപ്പൺ ലൈബ്രറിയിലേക്കുള്ള പുസ്തക സമർപ്പണം എന്നിവ നടക്കും. സ്കൂൾ, കോളജ് വിദ്യാർഥികൾക്കായി സംഘടിപ്പിക്കുന്ന വിവിധ മത്സരങ്ങളിലെ വിജയികൾക്ക് ക്യാഷ് അവാർഡും സർട്ടിഫിക്കറ്റും വിതരണം ചെയ്യും.
ആഘോഷത്തിന്റെ ഭാഗമായി സ്കൂൾ, കോളജ് വിദ്യാർഥികൾക്കായുള്ള മത്സരങ്ങൾ 25ന് (25-10-2026) ഉച്ചകഴിഞ്ഞ് രണ്ടുമുതൽ അഞ്ചുവരെ കോതമംഗലം മാർ ബേസിൽ ഹയർ സെക്കൻഡറി സ്കൂളിൽ നടക്കും. യുപി വിഭാഗത്തിൽ കൈയക്ഷര മത്സരം, ഹൈസ്കൂൾ വിഭാഗത്തിൽ കഥാരചനയും ജലച്ചായ ചിത്രരചനയും, ഹയർ സെക്കൻഡറി വിഭാഗത്തിൽ കേരളപ്പിറവി പ്രശ്നോത്തരിയും കവിതാരചനയും, കോളജ് വിഭാഗത്തിൽ ഉപന്യാസരചനയുമാണ് മത്സരങ്ങൾ.
കേരളപ്പിറവി ആഘോഷത്തിന്റെ നടത്തിപ്പിനായി ഷിബു തെക്കുംപുറം എംഎൽഎ ചെയർമാനും പ്രൊഫ. ബേബി എം. വർഗീസ് രക്ഷാധികാരിയും പ്രൊഫ. കെ.എം. കുര്യാക്കോസ് ജനറൽ കൺവീനറുമായ കമ്മിറ്റി രൂപീകരിച്ചു. ഡോ. ജേക്കബ് ഇട്ടൂപ്പ്, ബേസിൽ എബ്രഹാം, ബിന്ദു വർഗീസ് എന്നിവർ കോർ കമ്മിറ്റി അംഗങ്ങളാണ്.
മത്സരങ്ങളിൽ പങ്കെടുക്കാൻ താൽപര്യമുള്ള വിദ്യാർഥികൾ അതത് സ്ഥാപനങ്ങളിലെ ഉത്തരവാദപ്പെട്ടവരുമായി ബന്ധപ്പെടണം. വിവരങ്ങൾക്ക് പ്രൊഫ. കെ.എം. കുര്യാക്കോസ് (9447090463), ഡോ. ജേക്കബ് ഇട്ടൂപ്പ് (9446511134), ബേസിൽ എബ്രഹാം (9947068100) എന്നിവരുമായി ബന്ധപ്പെടാവുന്നതാണെന്ന് സംഘാടകർ അറിയിച്ചു.
