കോതമംഗലം: എംഎല്എയായി സത്യപ്രതിജ്ഞ ചെയ്ത് സ്ഥാനമേറ്റതിന്റെ നൂറാം ദിനത്തില് കോതമംഗലം എംഎല്എ ഷിബു തെക്കുംപുറം ഒരുക്കുന്ന വിര്ച്വല് ഓഫീസ് – എംഎല്എ കണക്റ്റ് ശനിയാഴ്ച പ്രവര്ത്തനം ആരംഭിക്കും. ഉച്ചകഴിഞ്ഞ് 3ന് എംഎല്എ ഓഫീസില് നടക്കുന്ന ചടങ്ങില് ഡീന് കുര്യാക്കോസ് എംപി പ്ലാറ്റ്ഫോം ഉദ്ഘാടനം ചെയ്യും.24 മണിക്കൂറും സേവനം ലഭ്യമാകുന്ന ഡിജിറ്റല് സംവിധാനമാണ് ‘എംഎല്എ കണക്റ്റ്’. എംഎല്എ ഓഫീസിലെത്താതെ തന്നെ പൊതുജനങ്ങള്ക്ക് അപേക്ഷകള് സമര്പ്പിക്കാനും പരാതികള് അറിയിക്കാനും വിവിധ സര്ക്കാര് പദ്ധതികളെക്കുറിച്ച് മനസ്സിലാക്കാനും പദ്ധതികളുടെ പുരോഗതി അറിയാനും ഇതിലൂടെ കഴിയും. സമര്പ്പിച്ച അപേക്ഷകളുടെ നിലവിലെ സ്ഥിതിയും ഓണ്ലൈനായി പരിശോധിക്കാം.
കോതമംഗലം നിയോജകമണ്ഡലത്തിലെ വിവിധ പൊതുസ്ഥാപനങ്ങളെയും സേവനങ്ങളെയും ഡിജിറ്റല് പ്ലാറ്റ്ഫോമുമായി ബന്ധിപ്പിച്ചിട്ടുണ്ട്. എംഎല്എയുടെ പൊതുപരിപാടികളുടെ ഷെഡ്യൂള്, വാര്ത്തകള്, സര്ക്കാര് അറിയിപ്പുകള്, വിവിധ സര്ക്കാര് പദ്ധതികളുടെ വിവരങ്ങളും അപ്ഡേറ്റുകളും പ്ലാറ്റ്ഫോമില് ലഭ്യമാകും. ഓഫീസ് പ്രവര്ത്തനസമയം കഴിഞ്ഞും എംഎല്എ ഓഫീസുമായി ബന്ധപ്പെടാനുള്ള സൗകര്യവും ഇതിലൂടെ ലഭിക്കും.എല്ലാം ഡിജിറ്റലാകുന്ന കാലഘട്ടത്തില് എംഎല്എ ഓഫീസിന്റെ പ്രവര്ത്തനങ്ങളും ആധുനിക രീതിയിലേക്ക് മാറ്റുന്നതിന്റെ ഭാഗമായാണ് വിര്ച്വല് ഓഫീസ് ഒരുക്കിയതെന്ന് ഷിബു തെക്കുംപുറം എംഎല്എ പറഞ്ഞു. വരും ദിവസങ്ങളില് കൂടുതല് സേവനങ്ങള് പ്ലാറ്റ്ഫോമില് ഉള്പ്പെടുത്തും. കോതമംഗലം നിയോജകമണ്ഡലത്തിലെ സര്ക്കാര്, പൊതുസേവനങ്ങള് ഒരു കുടക്കീഴില് ലഭ്യമാകുന്ന ഡിജിറ്റല് ഏകജാലക സംവിധാനമായി എംഎല്എ കണക്റ്റ് വികസിപ്പിക്കുകയാണ് ലക്ഷ്യമെന്നും വ്യക്തമാക്കി. 100 ദിന കര്മപരിപാടിയുടെ ഭാഗമായാണ് പദ്ധതി ആരംഭിക്കുന്നത്.
