കോതമംഗലം: ഭൂതത്താന്കെട്ടിന്റെ പ്രകൃതിഭംഗിയുടെ ദൂരകാഴ്ച ആസ്വദിക്കാന് വാച്ച് ടവര് തുറന്നു.പത്തുവര്ഷമായി അടഞ്ഞുകിടന്നിരുന്ന ഭൂതത്താന്കെട്ടിലെ വാച്ച് ടവര് സഞ്ചാരികള്ക്കായി തുറന്ന് ഷിബു തെക്കുംപുറം എംഎല്എ ഉദ്ഘാടനം നിര്വഹിച്ചു. ഭൂതത്താന്കെട്ടിന്റെ വിനോദസഞ്ചാര സാധ്യതകള് കൂടുതല് പ്രയോജനപ്പെടുത്തുന്നതിനും സഞ്ചാരികള്ക്ക് മികച്ച അനുഭവം ഒരുക്കുന്നതിന്റെയും ഭാഗമായാണ് വര്ഷങ്ങളായി അടഞ്ഞുകിടന്നിരുന്ന വാച്ച് ടവര് വീണ്ടും തുറന്നത്. യുഡിഎഫ് സര്ക്കാരിന്റെ കാലത്ത് 2014ലാണ് വാച്ച് ടവര് നിര്മിച്ചത്.
പ്രകൃതിഭംഗി ആസ്വദിക്കുന്നതിനൊപ്പം സെല്ഫി ഉള്പ്പെടെ നല്ല ചിത്രങ്ങള് പകര്ത്തുന്നതിനായി പിവിഐപി ഉദ്യോഗസ്ഥരുടെ സഹകരണത്തോടെ പ്രത്യേക സെല്ഫി പോയിന്റും ഇവിടെ സജ്ജീകരിച്ചിട്ടുണ്ട്. വാച്ച് ടവറിനോടനുബന്ധിച്ച് ഒരുക്കിയ പുതിയ സൗകര്യങ്ങള് ഭൂതത്താന്കെട്ടിന്റെ വിനോദസഞ്ചാര ആകര്ഷണം വര്ധിപ്പിക്കുമെന്നാണ് പ്രതീക്ഷ.
ഐടിപിഎംസിയുടെ നേതൃത്വത്തില് നവീകരിക്കുന്ന ഭൂതത്താന്കെട്ടിലെ ഏറുമാടവും ഹോംസ്റ്റേയും ഉടന് സഞ്ചാരികള്ക്കായി തുറന്നുകൊടുക്കും. താമസസൗകര്യങ്ങള് കൂടി മെച്ചപ്പെടുന്നതോടെ ഭൂതത്താന്കെട്ടിലെത്തുന്നവര്ക്ക് കൂടുതല് സമയം ഇവിടെ ചെലവഴിക്കാനും. പ്രകൃതിയോട് ചേര്ന്നുള്ള വിനോദസഞ്ചാര അനുഭവം ആസ്വദിക്കാനും സാധിക്കും. പുതിയ പദ്ധതികള് പ്രാദേശിക ടൂറിസ വികസനത്തിന് കൂടുതല് ഉണര്വേകുമെന്നാണ് വിലയിരുത്തല്. ചടങ്ങില് കുട്ടമ്പുഴ പഞ്ചായത്ത് പ്രസിഡന്റ് മേരി കുര്യാക്കോസ്, റോയ് ഓടക്കല്, ജെയിംസ് കോറമ്പേല്, പിവിഐപി എക്സിക്യൂട്ടീവ് എന്ജിനീയര് സി.എന് രഞ്ജിത, അസിസ്റ്റന്റ് എക്സിക്യൂട്ടീവ് എന്ജിനീയര് വി.ജി. ജോര്ഡി , മറ്റു പിവിഐപി ഉദ്യോഗസ്ഥര് തുടങ്ങിയവര് പങ്കെടുത്തു.
ലാവണ്യം 2026 ഓണാഘോഷ പരിപാടികള്ക്ക് ചൊവ്വാഴ്ച തുടക്കം.
സംസ്ഥാന വിനോദസഞ്ചാര വകുപ്പും, എറണാകുളം ജില്ലാ ഭരണകൂടവും, ജില്ലാ ടൂറിസം പ്രമോഷന് കൗണ്സിലും സംയുക്തമായി സംഘടിപ്പിക്കുന്ന ലാവണ്യം 2026 ഓണാഘോഷ പരിപാടികള്ക്ക് ചൊവ്വാഴ്ച തുടക്കമാകും. കുട്ടമ്പുഴ പന്തപ്ര ഉന്നതിയില് രാവിലെ 11.30ന് നടക്കുന്ന ചടങ്ങില് ഉന്നത വിദ്യാഭ്യാസ വകുപ്പ് മന്ത്രി റോജി എം. ജോണ് ഉദ്ഘാടനം നിര്വഹിക്കും. ഓണത്തിന്റെ പാരമ്പര്യവും ഗ്രാമീണ ജീവിതത്തിന്റെ തനിമയും പ്രകൃതിയുടെ സൗന്ദര്യവും സമന്വയിപ്പിച്ച് വിനോദസഞ്ചാര മേഖലയെ കൂടുതല് സജീവമാക്കുക എന്ന ലക്ഷ്യത്തോടെയാണ് ലാവണ്യം 2026 സംഘടിപ്പിക്കുന്നത്. പന്തപ്രയിലെ ഗോത്രവര്ഗ മേഖലയുടെ പ്രകൃതിഭംഗിയും തനത് സംസ്കാരവും സഞ്ചാരികള്ക്ക് പരിചയപ്പെടുത്തുന്നതിനും പരിപാടി വഴിയൊരുക്കും.
