മൂവാറ്റുപുഴ: മൂവാറ്റുപുഴ-പെരുമ്പാവൂര് എംസി റോഡില് നിയന്ത്രണം നഷ്ട്പ്പെട്ട മിനി ബസ് വാഹന ഷോറൂമിലേക്ക് ഇടിച്ച് കയറി മറിഞ്ഞ് അപകടം. എംസി റോഡില് പുളിഞ്ചുവട് കവലയില് ഞായറാഴ്ച രാത്രി 8.30 ഓടെയുണ്ടായ അപകടത്തില് ബസിലുണ്ടായിരുന്ന തിരുവനന്തപുരം സ്വദേശികളായ 17 പേര്ക്ക് പരിക്കേറ്റു.
ചാലക്കുടിയിലെ പൊതുപരിപാടിയില് പങ്കെടുത്ത ശേഷം തിരുവനന്തപുരത്തേക്ക് മടങ്ങുകയായിരുന്ന സംഘം സഞ്ചരിച്ച ബസ് നിയന്ത്രണം നഷ്ട്പ്പെട്ട് പുളിഞ്ചുവട് കവല മീന് മാര്ക്കറ്റിനു സമീപം പാര്ക്ക് ചെയ്തിരുന്ന വാഹനങ്ങളില് ഇടിച്ച ശേഷം റോഡരികിലെ വാഹന ഷോറൂമിലേക്ക് ഇടിച്ച്കയറി മറിയുകയായിരുന്നു.
അപകടത്തില് പരിക്കേറ്റയാത്രക്കാരെ ഓടിക്കൂടിയ നാട്ടുകാരും,മൂവാറ്റുപുഴ ഫയര്ഫോഴ്സ് സംഘവും, പോലീസും ചേര്ന്ന് മൂവാറ്റുപുഴയിലെ സ്വകാര്യ ആശുപത്രിയില് പ്രവേശിപ്പിച്ചു. ആരുടെയും പരിക്കുകള് ഗുരുതരമല്ല. അപകടത്തെ തുടര്ന്ന് എംസി റോഡില് ഗതാഗതം തടസ്സപ്പെട്ടിരുന്നു. വാഹനങ്ങള് റോഡില് നിന്ന് നീക്കം ചെയ്ത് ഗതാഗതം പുനസ്ഥാപിക്കുകയായിരുന്നു.
