മൂവാറ്റുപുഴ: മാറാടിയില്‍ പട്ടാപ്പകല്‍ വയോധികയുടെ വായില്‍ തുണി തിരുകി സ്വര്‍ണാഭരണങ്ങള്‍ കവര്‍ന്നു.ഞായറാഴ്ച രാവിലെ എട്ടോടെ മാറാടി മഞ്ചേരിപ്പടിയില്‍ പൂമറ്റത്തില്‍ മറിയാമ്മയുടെ വീട്ടിലാണ് മോഷണം നടന്നത്. അവിവാഹിതയായ മറിയാമ്മയും, തമിഴ്നാട് സ്വദേശിനിയായ വീട്ടുജോലിക്കാരിയും മാത്രമാണ് വീട്ടില്‍ താമസിച്ച് വന്നിരുന്നത്. സമീപത്തെ താമസക്കാരായ മറിയാമ്മയുടെ സഹോദരനും കുടുംബവും പള്ളിയില്‍ പോയസമയം വീട്ടിലെത്തിയ മോഷ്ടാവ് ജോലിക്കാരിയെ മുറിയില്‍ പൂട്ടിയിട്ട ശേഷം, മറിയാമ്മയുടെ വായില്‍ തുണി തിരുകി മറിയാമ്മ ധരിച്ചിരുന്ന സ്വര്‍ണാഭരണങ്ങള്‍ മോഷ്ടിക്കുകയായിരുന്നു. മറിയാമ്മ ധരിച്ചിരുന്ന ആറ് വളകളും, മാലയും ഉള്‍പ്പെടെ 12 പവനോളം സ്വര്‍ണമാണ് മോഷ്ടവ് കവര്‍ന്നത്.
മറിയാമ്മ ധരിച്ചിരുന്ന കമ്മലും, മോതിരവും കൂടി മോഷ്ടിക്കാന്‍ ശ്രമം നടത്തിയെങ്കിലും ഒടുവില്‍ ശ്രമം ഉപേക്ഷിക്കുകയായിരുന്നു. വിവരമറിഞ്ഞ് മൂവാറ്റുപുഴ പോലീസും, മാറാടി പഞ്ചായത്ത് പ്രസിഡന്റ് ഷാന്റി ഏബ്രഹാമും, മറ്റ് ജനപ്രതിനിധികളും സ്ഥലത്തെത്തി. ഇന്‍ക്വസ്റ്റ് നടപടികള്‍ പൂര്‍ത്തിയാക്കി പോലീസ് അന്വേഷണം ആരംഭിച്ചു. തമിഴ്നാട് സ്വദേശിയായ വീട്ടുജോലിക്കാരിയെ പോലീസ് ചോദ്യം ചെയ്തുവരികയാണ്
