കോതമംഗലം: കോതമംഗലം താലൂക്ക് ആശുപത്രിക്ക് മുന്നില് മഴയത്തുണ്ടാകുന്ന വെള്ളക്കെട്ടിന് പരിഹാരം നീളുന്നു. റോഡിലൂടെയുള്ള യാത്രയ്ക്ക് ബുദ്ധിമുട്ട് സൃഷ്ടിക്കുന്നതിന് പുറമെ സമീപത്തെ കടകള്ക്കുള്ളില് വെള്ളം കയറുന്നതും ഗുരുതരപ്രശ്നമാണ്. വേനല്മഴയില് മൂന്ന് ദിവസമാണ് ഇവിടെ അതിരൂക്ഷ വെള്ളക്കെട്ട് ഉണ്ടായത്. റോഡില് രണ്ട് അടിയിലേറെയാണ് വെള്ളം ഉയര്ന്നത്. കടകളിലേക്ക് മാത്രമല്ല താലൂക്ക് ആശുപത്രി കോമ്പൗണ്ടിലേക്കും വെള്ളം ഒഴുകിയിരുന്നു.
മലിനജലമാണ് കടകള്ക്കുള്ളിലും ആശുപത്രി കോമ്പൗണ്ടിലും ഒഴുകിയെത്തിയത്. ഇവിടെ ബസ്സ്റ്റോപ്പ് കൂടിയുണ്ട്. ബസില്നിന്നിറങ്ങാനും കയറാനും യാത്രക്കാര് ബുദ്ധിമുട്ടുകയാണ്. ബൈപാസിലേക്കുളള ലിങ്ക് റോഡും വെള്ളത്തില് മുങ്ങും. വേനല്മഴ വളരെപ്പെട്ടെന്ന് പെയ്ത് മാറുന്നതിനാല് വെള്ളക്കെട്ട്
നീണ്ടുനില്ക്കാറില്ലെന്നതാണ് ആശ്വാസം. എന്നാ കാലവര്ഷമെത്തിയാല് സ്ഥിതി ഗുരുതരമാകും. ഒന്നോ രണ്ടോ ദിവസം തുടര്ച്ചയായി മഴ പെയ്യാനുള്ള സാധ്യത നിലനില്ക്കെ വെള്ളക്കെട്ട് വലിയൊരു ശാപമായി മാറിയേക്കും. കടകള് അടച്ചിടുകയും വാഹനങ്ങള് വഴിതിരിച്ചുവിടേണ്ടിയും വന്നേക്കാമെന്നാണ് വിലയിരുത്തല്. മഴക്കാലം ശക്തമാകുംമുമ്പേ അടിയന്തര നടപടി വേണമെന്നാണ് ആവശ്യം.
