കോതമംഗലം: പിണവൂര്‍കുടിയിലെ വനിതാ പഞ്ചായത്ത് മെമ്പറെ മര്‍ദ്ദിച്ചകോസില്‍ മുഴുവന്‍ പ്രതികളെയും അറസ്റ്റ് ചെയ്യണമെന്നാവശ്യപ്പെട്ട് മഹിള കോണ്‍ഗ്രസ് കുട്ടമ്പുഴ മണ്ഡലം കമ്മിറ്റിയുടെ നേതൃത്വത്തില്‍ പോലീസ് സ്റ്റേഷന്‍ മാര്‍ച്ച് നടത്തി. പിണവൂര്‍കുടിയിലെ ആശാവര്‍ക്കറും പഞ്ചായത്ത് മെമ്പറുമായ ബിന്ദു രാജേന്ദ്രനാണ് വിഷുദിനത്തില്‍ മര്‍ദ്ദനമേറ്റത്.
പിണവൂര്‍കുടിയിലെ പ്രാദേശിക ക്ലബ്ബിന്റെ വിഷു ആഘോഷ പരിപാടികള്‍ ഉദ്ഘാടനം ചെയ്ത് പുറത്തിറങ്ങിയ പഞ്ചായത്ത് മെമ്പറേയും കുടുംബക്കാരെയും മര്‍ദ്ദിക്കുകയായിരുന്നു. അനധികൃത മദ്യവില്പന പോലീസിനെ അറിയിച്ചതിന്റെ വൈരാഗ്യത്തില്‍ ഇടതുപക്ഷ പ്രവര്‍ത്തകരുടെ നേതൃത്വത്തിലാണ് തന്നെ ആക്രമിച്ചതെന്നാണ് പരിക്കേറ്റ വാര്‍ഡ് മെമ്പറുടെ പരാതി.
പരാതിയുടെ അടിസ്ഥാനത്തില്‍ മൂന്ന് പേര്‍ക്കെതിരെ പോലീസ് കേസെടുത്തിട്ടുണ്ട്. രണ്ട് പേരെ പിടികൂടിയിട്ടുണ്ട്. കേസില്‍ ഉള്‍പ്പെട്ട മുഴുവന്‍ പ്രതികളെയും കേസെടുത്ത് അറസ്റ്റ് ചെയ്യണമെന്ന് ആവശ്യപ്പെട്ടാണ് മഹിളാ കോണ്‍ഗ്രസ് കുട്ടമ്പുഴ മണ്ഡലം കമ്മിറ്റിയുടെ നേതൃത്വത്തില്‍ പോലീസ് സ്റ്റേഷന്‍ മാര്‍ച്ച് നടത്തിയത്. നൂറ് ഏക്കര്‍ ജംഗ്ഷനില്‍ നിന്ന് ആരംഭിച്ച മാര്‍ച്ച് പഞ്ചായത്ത് ഓഫീസിന് മുന്‍പില്‍ പോലീസ് തടഞ്ഞു. തുടര്‍ന്നു നടന്ന പ്രതിഷേധ ധര്‍ണ മൂവാറ്റുപുഴ നഗരസഭ ചെയര്‍പേഴ്‌സണ്‍ ജോയ്‌സ് മേരി ആന്റണി ഉദ്ഘാടനം ചെയ്തു.
മഹിളാ കോണ്‍ഗ്രസ് മണ്ഡലം പ്രസിഡന്റ് ബ്ലെസി ബേബി അധ്യക്ഷത വഹിച്ചു. പഞ്ചായത്ത് പ്രസിഡന്റ് മേരി കുര്യാക്കോസ്, കെഎസ്യു സംസ്ഥാന സെക്രട്ടറി പ്രിയ സി പി, ആദിവാസി കോണ്‍ഗ്രസ് സംസ്ഥാന സെക്രട്ടറി സിജു, മണ്ഡലം പ്രസിഡണ്ട് ജോഷി പൊട്ടക്കല്‍, വനിതാ സഹകരണ സംഘം പ്രസിഡന്റ് അന്നമ്മ ആന്റണി, മഹിളാ കോണ്‍ഗ്രസ് മണ്ഡലം വൈസ് പ്രസിഡണ്ട് രാജമ്മ രാജന്‍, പഞ്ചായത്ത് വൈസ് പ്രസിഡണ്ട് എല്‍ദോസ് ബേബി തുടങ്ങിയവര്‍ പ്രസംഗിച്ചു.
