കോതമംഗലം: കോതമംഗലം മണ്ഡലത്തില് എല്ഡിഎഫ് സ്ഥാനാര്ത്ഥി ആന്റണി ജോണ് 5000 വോട്ടിലധികം ഭൂരിപക്ഷത്തില് വിജയിക്കുമെന്ന് ഇടതുമുന്നണി വിലയിരുത്തല്. ബൂത്തുകളില് നിന്നുള്ള കണക്കുകള് പ്രകാരം രാഷ്ട്രീയത്തിന് അതീതമായ ഘടകങ്ങള് വിജയമുറപ്പിക്കുമെന്ന് മുന്നണി അവകാശപ്പെടുന്നു. യാക്കോബായ സഭയിലെ വലിയൊരു വിഭാഗത്തിന്റെയും കത്തോലിക്കാ വിഭാഗത്തിന്റെയും വോട്ടുകള് ആന്റണി ജോണിന് ലഭിച്ചെന്നാണ് എല്ഡിഎഫ് നിഗമനം.
എതിര്പക്ഷത്തുനിന്ന് അനുകൂലമായ അടിയൊഴുക്കുണ്ടായതിനാല് ഭൂരിപക്ഷം ഇനിയും വര്ധിച്ചേക്കാമെന്ന് സിപിഎം ഏരിയാ സെക്രട്ടറി കെ.എ ജോയി പറഞ്ഞു. സിപിഎമ്മിന്റെ കോട്ടയായ നെല്ലിക്കുഴിയില് നിന്നാണ് പ്രധാന പ്രതീക്ഷ. 2021 ലെ തെരഞ്ഞെടുപ്പില് 6600 വോട്ട് ഭൂരിപക്ഷം ലഭിച്ചപ്പോള് നെല്ലിക്കുഴിയില് നിന്ന് മാത്രം 4000 വോട്ടിന്റെ ലീഡ് ലഭിച്ചിരുന്നു. ഇത്തവണ വാരപ്പെട്ടി, കുട്ടമ്പുഴ പഞ്ചായത്തുകളിലും മുന്നണി പ്രതീക്ഷ വയ്ക്കുന്നു. സര്ക്കാരിന്റെ നേട്ടങ്ങളും ആന്റണി ജോണിന്റെ പ്രവര്ത്തന മികവും വോട്ടായി മാറിയെന്ന് എല്ഡിഎഫ് അവകാശപ്പെട്ടു. അതേസമയം, ഷിബു തെക്കുംപുറം 10,000 വോട്ടിലധികം ഭൂരിപക്ഷത്തില് വിജയിക്കുമെന്ന് യുഡിഎഫ് കണക്കുകൂട്ടുന്നു.
നെല്ലിക്കുഴിയുള്പ്പെടെ എട്ട് പഞ്ചായത്തുകളിലും ലീഡ് നേടുമെന്നാണ് വിലയിരുത്തല്. നഗരസഭയില് മുന്പെങ്ങുമില്ലാത്ത മേല്ക്കൈ ഇത്തവണയുണ്ടാകുമെന്ന് തെരഞ്ഞെടുപ്പ് കമ്മിറ്റി കണ്വീനര് ഷെമീര് പനക്കല് പറഞ്ഞു. യുഡിഎഫിന്റെ ഐക്യത്തോടെയുള്ള പ്രവര്ത്തനവും കൃത്യമായ ആസൂത്രണവും ഫലത്തില് പ്രതിഫലിക്കും. പത്ത് വര്ഷത്തെ വികസന മുരടിപ്പിലൂന്നിയ പ്രചാരണത്തിന് വോട്ടര്മാര്ക്കിടയില് സ്വീകാര്യത ലഭിച്ചുവെന്നും കെ.എ ജോയി വ്യക്തമാക്കി. 2016 ലും 2021 ലും മണ്ഡലം നഷ്ടപ്പെട്ട സാഹചര്യത്തില് അതീവ ജാഗ്രതയോടെയാണ് യുഡിഎഫ് തെരഞ്ഞെടുപ്പ് പ്രവര്ത്തനങ്ങള് ചിട്ടപ്പെടുത്തിയത്.
