കോതമംഗലം: വന്യമൃഗശല്യത്തിനെതിരെ കീരംപാറ കുട്ടമ്പുഴ പഞ്ചായത്തുകളിലെ ജനപ്രതിനിധികളുടെ നേതൃത്വത്തില്‍ പുന്നേക്കാട് ഫോറസ്റ്റ് സ്റ്റേഷന്‍ ഉപരോധിച്ചു. രണ്ട് പഞ്ചായത്തിലുള്‍പ്പെടുന്ന പുന്നേക്കാട്, തട്ടേക്കാട് റോഡിലും, വിവിധ പ്രദേശങ്ങളിലും നിരന്തരമായ കാട്ടാനകളുള്‍പ്പെടെയുള്ള വന്യമൃഗശല്യത്തിനെതിരെയായിരുന്നു പ്രതിക്ഷേധം.
ആര്‍ആര്‍ടിയെ മുഴുവന്‍ സമയവും നിയോഗിക്കുക, ഫെന്‍സിംഗ് പൂര്‍ത്തീകരിക്കുക, പുന്നേക്കാട് – തട്ടേക്കാട് റോഡില്‍ വഴിവിളക്കുകള്‍ സ്ഥാപിക്കുക. അടിക്കാട് വെട്ടുക, പ്ലാന്റേഷനില്‍ തങ്ങുന്ന കാട്ടാനകളെ പുഴകടത്തി വനത്തിലേക്ക് മാറ്റുക തുടങ്ങിയ ആവശ്യങ്ങള്‍ ഉന്നയിച്ചാണ് സമരം നടത്തിയത്. കീരമ്പാറ പഞ്ചായത്ത് പ്രസിഡന്റ് ഗോപി മുട്ടത്ത്, കുട്ടമ്പുഴ പഞ്ചായത്ത് പ്രസിഡന്റ് കാന്തി വെള്ളക്കയ്യന്‍, വൈസ് പ്രസിഡന്റുമാരായ ബീന റോജോ, സല്‍മ പരീത്, പഞ്ചായത്ത് സ്ഥിരംസമിതി അധ്യക്ഷരായ കെ.എ. സിബി, ഇ.സി. റോയി, മഞ്ജു സാബു, പഞ്ചായത്തംഗങ്ങളായ മാമച്ചന്‍ ജോസഫ്, ജോഷി പൊട്ടയ്ക്കല്‍, എല്‍ദോസ് ബേബി, കെ.എസ്. സനൂപ്, ബേസില്‍ ബേബി എന്നിവരാണ് പുന്നേക്കാട് ഫോറസ്റ്റ് ഓഫീസിനു മുമ്പില്‍ കുത്തിയിരുപ്പു സമരം നടത്തിയത്.
