കോതമംഗലം : കോതമംഗലം നിയോജക മണ്ഡലത്തിലെ ആദ്യ “അങ്കണവാടി കം ക്രഷിന് ” നെല്ലിക്കുഴിയിൽ തുടക്കമായി.നെല്ലിക്കുഴി പഞ്ചായത്തിലെ 3-)0 വാർഡിലെ സെന്റർ നമ്പർ 35 അങ്കണവാടിയോടാനുബന്ധിച്ചാണ് കുരുന്നുകൾക്കായി അങ്കണവാടി കം ക്രഷ് പ്രവർത്തനം ആരംഭിച്ചത്. അങ്കണവാടി കം ക്രഷിന്റെ ഉദ്ഘാടനം ആന്റണി ജോൺ എം എൽ എ നിർവഹിച്ചു. രാവിലെ 7 മണി മുതൽ വൈകിട്ട് 7 മണി വരെയാണ് ക്രഷിന്റെ പ്രവർത്തനം. ആറുമാസം മുതൽ ആറു വയസ്സുവരെയുള്ള കുട്ടികൾക്ക് വേണ്ടിയിട്ടാണ് ക്രഷ് ഒരുക്കിയിട്ടുള്ളത്. ഇവിടെ സേവനത്തിനായി പ്രത്യേക വർക്കർമാരെയും ഹെൽപ്പർ മാരെയും നിയോഗിച്ചിട്ടുണ്ട്.
കുട്ടികൾക്ക് ന്യൂട്രീഷൻ ഫുഡും നൽകും. അഭ്യസ്തവിദ്യരായ വീട്ടമ്മമാരെ തൊഴിൽ മേഖലയിലേക്ക് ആകർഷിക്കുന്നതിനും, വിവിധ തൊഴിൽ മേഖലകളിൽ സ്ത്രീകളുടെ പങ്കാളിത്തം വർദ്ധിപ്പിക്കുന്നതിനും, കുട്ടികളുടെ ശാരീരിക മാനസിക ഭൗതിക വികാസത്തിന് സുരക്ഷിതവും സംരക്ഷിതവുമായ സാഹചര്യം ഒരുക്കുകയെന്നതാണ് പദ്ധതിയുടെ ഉദ്ദേശം. തുടർച്ചയിൽ മണ്ഡലത്തിലെ കൂടുതൽ അങ്കണവാടിക ളോടനുബന്ധിച്ചും ക്രഷിന്റെ പ്രവർത്തനം വ്യാപിപ്പിക്കുമെന്നും എം എൽ എ പറഞ്ഞു.ചടങ്ങിൽ ഗ്രാമപഞ്ചായത്ത് പ്രസിഡന്റ് പി എം മജീദ് അധ്യക്ഷത വഹിച്ചു.ഗ്രാമ പഞ്ചായത്ത് വൈസ് പ്രസിഡന്റ് ശോഭ വിനയൻ,ക്ഷേമ കാര്യ സ്റ്റാൻഡിങ് കമ്മിറ്റി ചെയർ പേഴ്സൺ മൃദുല ജനാർദ്ധനൻ, ആരോഗ്യ- വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ എൻ ബി ജമാൽ,വികസന കാര്യ സ്റ്റാൻഡിങ് കമ്മിറ്റി ചെയർമാൻ എം എം അലി,കോതമംഗലം ഐ സി ഡി എസ് ശിശു വികസന പദ്ധതി ഓഫീസർ പിങ്കി കെ അഗസ്റ്റിൻ, ഐ സി ഡി എസ് സൂപ്പർ വൈസർ അനുപ്രിയ സജീവ് എന്നിവർ ചടങ്ങിൽ സംസാരിച്ചു.
