കോതമംഗലം : രണ്ട് ആടുകളെ എട്ട് തെരുവ് പട്ടികൾ ചേർന്ന് കടിച്ചു കൊന്നു. കീരംപാറ പഞ്ചായത്തിൽ വെളിയേൽ ചാലിൽ ജോബി സെബാസ്റ്റ്യന്റെ ആടുകളെയാണ് കൊന്നത്. വ്യാഴാഴ്ച രാത്രിയാണ് ആക്രമണം ഉണ്ടായത്.
കൂട്ടിൽ കെട്ടിയിട്ടിരുന്ന ആടുകളിൽ ഒരെണ്ണം ഗർഭിണിയായിരുന്നു. രണ്ടു ദിവസങ്ങൾക്കു മുൻപ് മറ്റൊരു വീട്ടിലും തെരുവുനായ ആക്രമണത്തിൽ ആട് ചത്തിരുന്നു. പുന്നേക്കാട് ടൗണിലും വെളിയേൽ ചാൽ പ്രദേശത്തും തെരുവുനായ ആക്രമണം ഉണ്ടാകുന്നു. പകലും രാത്രിയും കൂട്ടമായാണ് നായ്ക്കൾ എത്തുന്നത്.
കാൽനടയാത്രക്കാരും ടൂ വീലർ യാത്രക്കാരും ഭീതിയോടെയാണ് ഈ പ്രദേശങ്ങളിൽ സഞ്ചരിക്കുന്നത്. കുട്ടികളും സ്ത്രീ കളുമടക്കം വീടിനു പുറത്തിറങ്ങാൻ പോലും ഭയപ്പെടുന്നു. തെരുവുനായ ശല്യം രൂക്ഷമായ സാഹചര്യത്തിൽ പഞ്ചായത്ത് അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.
