കോതമംഗലം: കുട്ടമ്പുഴയില് വാറ്റുചാരായവും നാടന്തോക്കും എക്സൈസ് പിടികൂടി. പൂയംകുട്ടി തണ്ട് ഭാഗത്ത് തളിയച്ചിറ റെജി വര്ഗീസിന്റെ (45) പേരില് എക്സൈസ് കേസെടുത്തു. ഇയാള് ഓടിരക്ഷപ്പെട്ടു. ഇന്നലെ ഇയാളുടെ വീട്ടില്നിന്നാണ് നാലുലിറ്റര് വാറ്റുചാരായവും 130 ലിറ്റര് വാഷും വാറ്റുപകരണങ്ങളും പിടികൂടിയത്. വീട്ടിലെ കിടപ്പുമുറിയില് നിന്ന് ലൈസന്സ് ഇല്ലാത്ത നാടന്തോക്കും കണ്ടെടുത്തു. 150 സെന്റിമീറ്റര് നീളമുള്ള തോക്ക് കിടപ്പുമുറിയില് സ്ലാബിലാണ് സൂക്ഷിച്ചിരുന്നത്. റെജിയുടെ പേരില് അബ്കാരി കേസെടുത്ത് തോക്ക് കുട്ടന്പുഴ പോലീസിന് കൈമാറി. അനധികൃതമായി തോക്ക് കൈവശം വച്ചതിന് ആയുധ നിയമപ്രകാരം പോലീസും കേസെടുത്തു. കേസ് രേഖകളും തൊണ്ടിമുതലും കുട്ടന്പുഴ എക്സൈസ് റേഞ്ച് ഇന്സ്പെക്ടര്ക്ക് കൈമാറി. വാറ്റുചാരായ കേസില് മുന്പും റെജിയുടെ പേരില് കേസെടുത്തിട്ടുണ്ടെന്ന് എക്സൈസ് അധികൃതര് പറഞ്ഞു.
