കോതമംഗലം: കുട്ടമ്പുഴ ഞായപ്പിള്ളിയില്‍ റോഡ് സൈഡില്‍ ലോറിയില്‍ തടി കയറ്റി കൊണ്ടിരുന്നവരെ ബൈക്കിടിച്ച് അഞ്ചുപേര്‍ക്ക് പരിക്ക്. സാരമായി പരിക്കേറ്റ ഒരാളെ ആലുവയിലെ സ്വകാര്യ ആശുപത്രിയിലേക്ക് മാറ്റി.ഇഞ്ചത്തൊട്ടി കീറാന്‍ങ്ങല്‍ അമല്‍ സന്തോഷ് (24), ഞായപ്പിള്ളി കുളങ്ങരകണ്ടം കെ.വി. ജോബിഷ് (31), വാരപ്പെട്ടി പിടവൂര്‍ കോട്ടയ്ക്കല്‍ അബൂബക്കര്‍ (53), കുട്ടംപുഴ സത്രപ്പടി പടിക്കമാലില്‍ പി.ആര്‍. രാജേഷ് (27) എന്നിവരെ കോതമംഗലം എംബിഎംഎം ആശുപത്രിയില്‍ പ്രവേശിപ്പിച്ചു. തലയ്ക്ക് ഗുരുതര പരിക്കേറ്റ അമലിനെആലുവ രാജഗിരി ആശുപത്രി തീവ്രപരിചരണ വിഭാഗത്തിലേക്ക് മാറ്റി. ഇന്നലെ രാത്രി എട്ടിനായിരുന്നു അപകടം.
കുട്ടമ്പുഴ- തട്ടേക്കാട് റോഡില്‍ ഞായപ്പിള്ളി ധര്‍മഗിരിക്ക് സമീപത്ത് റോഡരികില്‍ റബ്ബര്‍തടി കയറ്റുന്നതിനിടെയാണ് അപകടം.
ഇരുട്ടില്‍ നിര്‍ത്തിയിട്ട ലോറി ശ്രദ്ധയില്‍പ്പെടാതിരുന്ന ബൈക്ക് തൊഴിലാളികളെ ഇടിക്കുകയായിരുന്നുവെന്നാണ് പോലീസ് നിഗമനം. ഓടിക്കൂടിയ നാട്ടുകാര്‍ വിവിധ വാഹനത്തിലായി പരിക്കേറ്റവരെ കോതമംഗലത്തെ ആശുപത്രിയില്‍ എത്തിക്കുകയായിരുന്നു.
