കോതമംഗലം: വന്യമൃഗങ്ങളെ പ്രതിരോധിക്കുവാന്‍ പുതിയ സാങ്കേതിക വിദ്യയായ ഹോം ഗാര്‍ഡുമായി കോട്ടപ്പടി മാര്‍ ഏലിയാസ് കോളേജിലെ വിദ്യാര്‍ത്ഥികള്‍. കോതമംഗലം താലൂക്കിലെ അഞ്ച് പഞ്ചായത്തുകളില്‍ ആന, കാട്ടുപന്നി തുടങ്ങിയ വന്യമൃഗങ്ങളുടെ ആക്രമണം വര്‍ധിക്കുന്ന സാഹചര്യത്തിലാണ് വിദ്യാര്‍ത്ഥികള്‍ ഈ നവീന സംവിധാനം വികസിപ്പിച്ചത്.സെന്‍സര്‍ അടിസ്ഥാനമാക്കിയുള്ള ഈ ഉപകരണം വന്യമൃഗങ്ങളുടെ ചലനം തിരിച്ചറിഞ്ഞ് ഉടന്‍ അലാറം മുഴക്കുകയും ചെയ്യുന്നു. ഇതിലൂടെ ആളുകള്‍ക്ക് മുന്‍കരുതല്‍ എടുക്കാനും അപകടങ്ങള്‍ ഒഴിവാക്കാനും കഴിയും.
കോളേജിലെ കമ്പ്യൂട്ടര്‍ സയന്‍സ് വിഭാഗത്തിന്റെയും NSS ന്റെയും നേതൃത്വത്തില്‍ രൂപകല്‍പ്പന ചെയ്ത ഈ പദ്ധതി കുറഞ്ഞ ചെലവില്‍ കോതമംഗലത്തെ ഗ്രാമങ്ങളില്‍ സ്ഥാപിക്കാനാകുന്നതാണ്.അതോടൊപ്പം, ഉപകരണത്തില്‍ ഘടിപ്പിക്കുന്ന ക്യാമറ മൃഗങ്ങളുടെ ഫോട്ടോ സ്വയമേവ പകര്‍ത്തുകയും അത് ഉടന്‍ തന്നെ കണ്‍ട്രോള്‍ റൂമിലേക്ക് അയയ്ക്കുകയും ചെയ്യുന്ന പുതിയ പദ്ധതി രൂപ കല്പന ചെയ്തു കൊണ്ടിരിക്കുകയാണ് . ഇതിലൂടെ അധികൃതര്‍ക്ക് സമയബന്ധിതമായി ഇടപെടാനും ആവശ്യമായ നടപടികള്‍ സ്വീകരിക്കാനും കഴിയും.എല്ലാതരം വന്യമൃഗങ്ങളെയും തിരിച്ചറിയുകയും അകറ്റുകയും ചെയ്യുന്നതിനുള്ള സംവിധാനമാണ് വിദ്യാര്‍ത്ഥികള്‍ ഒരുക്കിയിരിക്കുന്നത്.
നാല് ദിക്കുകളില്‍ നിന്നുമായി പന്ത്രണ്ട് മീറ്റര്‍ വരെ ദൂരത്തുള്ള മൃഗങ്ങളുടെ ചലനം മെഷീനിന് വിശകലനം ചെയ്യാന്‍ കഴിയും. സെന്‍സറുകളും ക്യാമറയും സംയോജിപ്പിച്ചിരിക്കുന്ന ഈ സംവിധാനം മൃഗങ്ങളുടെ സാന്നിധ്യം കണ്ടെത്തിയാല്‍ ഉടന്‍ അലാറം ശബ്ദവും ലൈറ്റ് സിഗ്‌നലും നല്‍കുന്നു.ബാറ്ററിയിലും സോളാര്‍ പവര്‍ സംവിധാനത്തിലുമാണ് ഈ ഉപകരണം പ്രവര്‍ത്തിക്കുന്നത്. അതിനാല്‍ വൈദ്യുതി ലഭ്യമല്ലാത്ത പ്രദേശങ്ങളിലുപോലും ഇത് സ്ഥാപിച്ച് പ്രവര്‍ത്തിപ്പിക്കാനാകും. കുറഞ്ഞ ചെലവില്‍ ഗ്രാമപ്രദേശങ്ങളില്‍ ഉപയോഗിക്കാവുന്ന ഈ സംവിധാനം മനുഷ്യ-വന്യമൃഗ സംഘര്‍ഷം കുറയ്ക്കുന്നതില്‍ വലിയ സഹായമാകും എന്നാണ് പ്രതീക്ഷ. നാട്ടില്‍ വര്‍ധിച്ചു വരുന്ന വന്യജീവി ശല്യത്തിനെതിരെ ”കാടത്തം നമ്മുടെ നാട്ടില്‍ വേണ്ട” എന്ന സന്ദേശവുമായി വിദ്യാര്‍ത്ഥികള്‍ വികസിപ്പിച്ച ‘ഹോം ഗാര്‍ഡ്’ ഉപകരണം ഗ്രാമീണ മേഖലകള്‍ക്ക് വലിയ ആശ്വാസമാകുമെന്ന് പ്രതീക്ഷിക്കുന്നു.
തട്ടേക്കാട്, പുന്നേക്കാട് മേഖലകളില്‍ ഈ ഉപകരണം സ്ഥാപിക്കുന്നതിന്റെ ഉദ്ഘാടനം ആന്റണി ജോണ്‍ MLA നിര്‍വഹിച്ചു.കോളേജ് ബോര്‍ഡ് പ്രസിഡന്റ് Fr. ജോസ് പരുത്തുവയലില്‍ ,മാനേജര്‍ സുനില്‍ ജോസഫ് , പ്രിന്‍സിപ്പല്‍ Dr. ജോസഫ് T മൂലയില്‍ തുടങ്ങിയവര്‍ പ്രസംഗിച്ചു. വന്യമൃഗശല്യത്തിനെതിരെ ഇത്തരം ഒരു ഉപകരണം മാര്‍ ഏലിയാസ് കോളേജിലെ വിദ്യാര്‍ത്ഥികള്‍ വികസിപ്പിച്ചെടുത്തതിലൂടെ വിദ്യാര്‍ത്ഥികള്‍ തങ്ങളുടെ സാമൂഹിക പ്രതിബദ്ധതയാണ് പ്രകടമാക്കിയതെന്ന് ആന്റണി ജോണ്‍ MLA പറഞ്ഞു.വന്യമൃഗ ആക്രമണം വര്‍ദ്ധിച്ചു വരുന്ന സാഹചര്യം ഉണ്ടായതിനെ തുടര്‍ന്നാണ് ഇത്തരം ഒരു ഉപകരണം കണ്ടു പിടിക്കാന്‍ കാരണമെന്ന് വിദ്യാര്‍ത്ഥിയായ എല്‍ജിത് എല്‍ദോ പറഞ്ഞു.
