കോതമംഗലം: കേരളത്തിലെ ആദ്യത്തെ ബൗസ്ട്രിംഗ് ആര്‍ച്ച് ബ്രിഡ്ജ് (വില്ലിന്റെ ഞാണ്‍ പോലെയുള്ള ആര്‍ച്ച് പാലം) നേര്യമംഗലത്ത് ഓഗസ്റ്റില്‍ നിര്‍മാണം പൂര്‍ത്തിയാകുമെന്ന് സ്ഥലം സന്ദര്‍ശിച്ച് നിര്‍മാണ പുരോഗതി വിലയിരുത്തിയ ഡീന്‍ കുര്യാക്കോസ് എംപി പറഞ്ഞു. 42 മീറ്റര്‍ നീളത്തിലുള്ള അഞ്ച് സ്പാനുകള്‍ കൂടി ചേര്‍ത്ത് ആകെ 214 മീറ്റര്‍ നീളത്തില്‍ ഉള്ള പാലം 13 മീറ്റര്‍ വീതിയിലാണ് പൂര്‍ത്തീകരിക്കുന്നത്. ഇതില്‍ എട്ട് മീറ്റര്‍ വാഹനങ്ങള്‍ കടന്നുപോകുന്നതിനായുളള വീതിയാണ്.
ഇപ്പോഴുള്ള പാലത്തിന് ആകെ നാല് മീറ്ററാണ് വീതി. ഇരു വശങ്ങളിലുമായി 1.5 മീറ്റര്‍ വീതിയില്‍ നടപ്പാതയും നിര്‍മിക്കും. നിലവില്‍ മൂന്ന് ബൗസ്ട്രിംഗ് ആര്‍ച്ച് ഘടിപ്പിക്കുന്ന ജോലി പൂര്‍ത്തീകരിച്ചിട്ടുണ്ട്. നാലാമത്തെ സ്പാനിനുള്ള ആര്‍ച്ച് ഘടിപ്പിക്കല്‍ ഈ ആഴ്ച തന്നെ പൂര്‍ത്തീകരിക്കും. തുടര്‍ന്ന് അഞ്ചാം ആര്‍ച്ചും ഘടിപ്പിച്ച് പാലത്തില്‍ പാകിയിട്ടുള്ള സ്റ്റീല്‍ പ്രതലത്തില്‍ കോണ്‍ക്രീറ്റിംഗ് കൂടി ചെയ്താല്‍ പിന്നീട് അന്തിമ ഘട്ടത്തില്‍ ഉള്ള പ്രവര്‍ത്തികള്‍ മാത്രമേ ബാക്കിയുള്ളൂ.
2027 മാര്‍ച്ച് വരെ കരാര്‍ കമ്പനിക്ക് കാലാവധി ദീര്‍ഘിപ്പിച്ച് നല്‍കിയിട്ടുണ്ടെങ്കിലും ഓഗസ്റ്റില്‍ തന്നെ പണി പൂര്‍ത്തിയാക്കാന്‍ കഴിയുമെന്ന് പ്രോജക്ട് എന്‍ജിനീയര്‍ മുരളി വ്യക്തമാക്കിയതായി എംപി പറഞ്ഞു. കവളങ്ങാട് പഞ്ചായത്ത് മുന്‍ പ്രസിഡന്റ് സൈജന്റ് ചാക്കോ, ജൈമോന്‍ ജോസ്, ബേസില്‍ പറേക്കുടി, ലിനോ തോമസ് എന്നിവരും എംപിയോടൊപ്പം ഉണ്ടായിരുന്നു.
