കോതമംഗലം: കൊച്ചി – ധനുഷ്കോടി ദേശീയപാതയിൽ പാതയുടെ അശാസ്ത്രീയ നിർമ്മാണം മൂലം കോതമംഗലം മണ്ഡലത്തിലൂടെ ദേശീയപാത കടന്നുപോകുന്ന പല പ്രദേശങ്ങളിലും, അടിക്കടി വലിയ വെള്ളക്കെട്ടാണ് രൂപപ്പെടുന്നത്. ടി വിഷയം അടിയന്തരമായി പരിഹരിക്കാൻ ദേശീയപാത അധികൃതർ ഫലപ്രദമായ നടപടികൾ സ്വീകരിക്കണമെന്ന് താലൂക്ക് വികസന സമിതി യോഗം ആവശ്യപ്പെട്ടു. മണികണ്ഠൻ ചാൽ ചപ്പാത്തിൽ ഒഴുക്കിൽപ്പെട്ട് കാണാതായ ബിജുവിനായി ആറു ദിവസം നടന്ന തിരച്ചിലിൽ പങ്കാളികളായ ഏവർക്കും എം എൽ എ യോഗത്തിൽ പ്രത്യേകമായി നന്ദി രേഖപ്പെടുത്തി .
കാല വർഷക്കെടുതിയിൽ ഉണ്ടായ നാശനഷ്ടങ്ങളെ സംബന്ധിച്ച് യോഗം വിശദമായി ചർച്ച ചെയ്തു. വീടുകൾക്കും കൃഷി ഉൾപ്പെടെ ഉണ്ടായിട്ടുള്ള നാശനഷ്ടങ്ങൾക്ക് സമയബന്ധിതമായി തന്നെ നഷ്ടപരിഹാരം ലഭ്യമാക്കാൻ ബന്ധപ്പെട്ട വകുപ്പുകൾ പ്രത്യേകമായി ശ്രദ്ധിക്കണമെന്ന് യോഗം നിർദ്ദേശിച്ചു.കുട്ടമ്പുഴ-വെള്ളാരംകുത്ത്- മണികണ്ഠൻ ചാൽ കെ എസ് ആർ ടി സി ബസ് സർവീസും,കോതമംഗലം നെല്ലിമറ്റം – വാളാച്ചിറ – പൈങ്ങോട്ടൂർ കെ എസ് ആർ ടി സി ബസ് സർവീസും മുടക്കം വരാതെ നടത്തുന്നുണ്ടെന്ന് KSRTC അധികൃതർ ഉറപ്പുവരുത്തണമെന്ന് യോഗം നിർദ്ദേശിച്ചു. കോതമംഗലം മണ്ഡലത്തിൽ വന്യമൃഗ ശല്യം തടയുന്നതിന് പ്രഖ്യാപിച്ചിട്ടുള്ള ഫെൻസിങ്,ഹാങ്ങിങ് ഫെൻസിങ്, ട്രഞ്ച് എന്നീ പദ്ധതികളുടെ കാര്യക്ഷമവും സമയബന്ധിതവുമായ പൂർത്തീകരണം ബന്ധപ്പെട്ട ഡി എഫ് ഒ മാർ ഉറപ്പുവരുത്തണമെന്നും യോഗം നിർദേശിച്ചു. കോതമംഗലം താലൂക്കിലെ വനം മേഖലയോട് ചേർന്നുവരുന്ന പല പ്രദേശങ്ങളിലും വന്യമൃഗങ്ങളുടെ സാന്നിധ്യം പതിവായി കണ്ടുവരുന്ന സാഹചര്യത്തിൽ വനം വകുപ്പിന്റെ കൃത്യമായ നിരീക്ഷണവും ജാഗ്രതയും ഉണ്ടാകണമെന്ന് യോഗം നിർദേശിച്ചു. രാസ- ലഹരി വ്യാപനം തടയുന്നതിനായി എക്സൈസ്- പോലീസ് വകുപ്പുകൾ സ്വീകരിച്ചു വരുന്ന നടപടികൾ കൂടുതൽ കർശനമായി ജനങ്ങൾ മുന്നോട്ടു കൊണ്ടുപോകണമെന്ന് യോഗം നിർദ്ദേശിച്ചു. കാലവർഷ വ്യതിയാനം മുന്നിൽ കണ്ട് അപകടാവസ്ഥയിൽ നിൽക്കുന്ന മരങ്ങൾ മുറിച്ചു മാറ്റുന്നതിന് വേണ്ട നടപടികൾ ബന്ധപ്പെട്ട വകുപ്പ് മേധാവികൾ കൈക്കൊള്ളണമെന്നും അപകട ഭീതി ഒഴിവാക്കണമെന്നും യോഗം നിർദ്ദേശിച്ചു.
കോതമംഗലം പട്ടണത്തിലും സമീപ പ്രദേശങ്ങളിലുമായി പ്രധാന റോഡുകളിലെ അനധികൃതമായ വാഹന പാർക്കിങ്ങിന് എതിരെ ആവശ്യമായ നടപടി പോലീസ് മോട്ടോർ വാഹന വകുപ്പ് സ്വീകരിക്കണമെന്ന് യോഗം നിർദ്ദേശിച്ചു. കോതമംഗലത്ത് സ്ഥിരമായി ട്രാഫിക് നിയമലംഘനം നടത്തുന്ന കെ എസ് ആർ ടി സി, പ്രൈവറ്റ് ബസ്സുകൾക്കായി കർശന നടപടികൾ സ്വീകരിക്കാൻ പോലീസ് – മോട്ടോർ വാഹന വകുപ്പ് തയ്യാറാകണമെന്ന് യോഗം നിർദ്ദേശിച്ചു. കോതമംഗലം താലൂക്കിന്റെ വിവിധ പ്രദേശങ്ങളിൽ രാത്രി കാലങ്ങളിൽ വ്യാപാര സ്ഥാപനങ്ങളിൽ തുടർച്ചയായി മോഷണങ്ങൾ ഉണ്ടാകുന്ന സാഹചര്യത്തിൽ പോലീസ് പെട്രോളിംഗ് രാത്രികാലങ്ങളിൽ കൂടുതൽ കാര്യക്ഷമമാക്കണമെന്ന് യോഗം നിർദ്ദേശിച്ചു. കോതമംഗലം മിനി സിവിൽ സ്റ്റേഷൻ കോൺഫറൻസ് ഹാളിൽ ചേർന്ന് യോഗത്തിൽ ആന്റണി ജോൺ എം എൽ എ അധ്യക്ഷത വഹിച്ചു.യോഗത്തിൽ മുനിസിപ്പൽ വൈസ് ചെയർപേഴ്സൺ സിന്ധു ഗണേശൻ, തഹസിൽദാർ അനിൽകുമാർ എം, കോട്ടപ്പടി പഞ്ചായത്ത് പ്രസിഡന്റ് മിനി ഗോപി,കുട്ടമ്പുഴ പഞ്ചായത്ത് പ്രസിഡൻറ് കാന്തി വെള്ളക്കയ്യൻ , കീരംപാറ പഞ്ചായത്ത് പ്രസിഡൻറ്റ് ഗോപി എം പി, രാഷ്ട്രീയ പാർട്ടി പ്രതിനിധികളായ എം എസ് എൽദോസ്, ആന്റണി പാലക്കുഴി, ബേബി പൗലോസ്, സാജൻ അമ്പാട്ട്,തോമസ് വട്ടപ്പാറ എന്നിവർ പങ്കെടുത്തു.
