കോതമംഗലം: നേര്യമംഗലം റേഞ്ചിലെ നഗരംപാറ ഫോറസ്റ്റ് സ്റ്റേഷനിൽ മൊഴി നൽകാനെത്തിയ പ്രതി അക്രമാസക്തനായി. ഊന്നുകൽ പോലീസ് കസ്റ്റഡിയിലെടുത്ത പ്രതിയെ ഇന്ന് കോടതിയിൽ ഹാജരാക്കും. നഗരംപാറ ഫോറസ്റ്റ് സ്റ്റേഷനിൽ ഇന്നലെ വൈകിട്ടാണ് ആക്രമണം ഉണ്ടായത്. മൂന്ന് ഫോറസ്റ്റ് ഉദ്യോഗസ്ഥർക്ക് ആക്രമണത്തിൽ പരിക്കേറ്റു. സ്റ്റേഷൻ്റെ ജനാലകൾ തകർന്നിട്ടുണ്ട്. വനം കുറ്റകൃത്യത്തിൽ പ്രതിയായ കീരിത്തോട് സ്വദേശി പ്രജീഷും ഒരു സ്ത്രീയും കൂടി നഗരംപാറ ഫോറസ്റ്റ് സ്റ്റേഷനിൽ മൊഴി കൊടുക്കാനെത്തിയപ്പോഴാണ് അക്രമ സംഭവം ഉണ്ടായത്. പെട്ടെന്ന് പ്രകോപിതനായ പ്രതി ഫോറസ്റ്റ് സ്റ്റേഷനിൽ ഭീകരാന്തരീക്ഷം സൃഷ്ട്രിക്കുകയും, അസഭ്യം പറയുകയുമായിരുന്നു.തുടർന്ന് പ്രജീഷും ഒപ്പമുണ്ടായിരുന്ന സ്ത്രീയും ഫോറസ്റ്റ് ജീവനക്കാരെ ആക്രമിച്ചെന്നാണ് പരാതി.
ഡെപ്യൂട്ടി ഫോറസ്റ്റ് റേഞ്ച് ഓഫീസർ GG സന്തോഷ്, ബീറ്റ്ഫോറസ്റ്റ് ഓഫീസർമാരായ അർച്ചന, നീനു എന്നിവർക്കാണ് പരിക്കേറ്റത്. ഫോറസ്റ്റ് സ്റ്റേഷൻ്റെ ജനാല കല്ലെറിഞ്ഞ് തകർത്തിട്ടുണ്ട്. പ്രതിക്ക് ഒപ്പമുണ്ടായിരുന്ന സ്ത്രീ ഓടി രക്ഷപെട്ടു. സംഭവത്തെ തുടർന്ന് സ്ഥലത്തെത്തിയ ഊന്നുകൽ പോലീസ് പ്രജീഷിനെ കസ്റ്റഡിയിലെടുത്തു. ഊന്നുകൽ എസ് ഐ യുടെ നേതൃത്വത്തിൽ പോലീസ് ഇന്ന് സ്ഥലത്തെത്തി മഹസർ തയ്യാറാക്കി. പ്രതിയെ ഇന്ന് കോടതിയിൽ ഹാജരാക്കും. പ്രകോപിതനായ പ്രതി തൻ്റെ യൂണിഫോം വലിച്ചു കീറുകയും മർദ്ദിക്കുകയുമായിരുന്നുവെന്ന് ഡെപ്യൂട്ടി റേഞ്ച് ഓഫീസർ GG സന്തോഷ് പറഞ്ഞു.
