കോതമംഗലം: പിണ്ടിമന പഞ്ചായത്തിലെ പ്രധാന റോഡിലെ തണ്ണിക്കോട്ട് പാലത്തിൻ്റെ നിർമ്മാണ പ്രവർത്തനങ്ങൾ മന്ദഗതിയിലാണെന്ന് താലൂക്ക് പൗരസമിതി യോഗം ആരോപിച്ചു.
ഈ വിധം നിർമ്മാണം മന്ദഗതിയിൽ മുന്നോട്ടുപോയാൽ ഒന്നരവർഷമെങ്കിലും എടുക്കും പാലവും അനുബന്ധറോഡുകളും പൂർത്തിയാക്കാൻ. നിർമ്മാണ ആരംഭിച്ചിട്ട് 32 ദിസമായിട്ടും 7 ദിവസം കൊണ്ട് തീർക്കാവുന്ന അടിസ്ഥാന പ്രവർത്തികൾ പോലും പൂർത്തിയായിട്ടില്ല. നിരവധി യാത്രക്കാർ നിത്യേന ഉപയോഗിക്കുന്ന റോഡിൽ 6 സർവ്വീസ് ബസുകളും, നിരവധി സ്കൂൾ ബസുകളും, നൂറു കണക്കിന് മറ്റു വാഹനങ്ങളും സഞ്ചരിച്ചിരുന്നതാണ്.
പാലം പൊളിച്ച സ്ഥലത്ത് താൽക്കാലിക നടപ്പാത പോലും നിർമ്മിക്കാൻ കരാറുകാരൻ ഇതുവരെ തയ്യാറായിട്ടില്ല. ജനപ്രതിനിധികളോ, ഉദ്യോഗസ്ഥരോ സ്ഥലം സന്ദർശിച്ച് നിർമ്മാണ പ്രവർത്തികൾ വിലയിരുത്തുന്നുമില്ല. ജനസാന്ദ്രത കൂടിയ പ്രദേശങ്ങളിൽ യുദ്ധകാലാടിസ്ഥാനത്തിൽ പൊതുമരാമത്ത് പണികൾ പൂർത്തീകരിക്കണമെന്ന കളക്ടറുടെ നിർദ്ദേശമുള്ളതാണ്. അധികാരികൾ സ്ഥലം സന്ദർശിച്ച് നിർമ്മാണം പൂർത്തിയാക്കുന്ന തിയ്യതി പരസ്യമായി പ്രഖ്യാപിക്കണമെന്ന്
കോതമംഗലം താലൂക്ക് പൗരസമിതി ഭാരവാഹികൾ ആവശ്യപ്പെട്ടു. അല്ലാത്തപക്ഷം പ്രത്യക്ഷ സമരപരിപാടികൾ ആവിഷ്‌കരിക്കുമെന്ന് പൗരസമിതി ചെയർമാൻ അഡ്വ.പോൾ മുണ്ടക്കൽ, പ്രസിഡന്റ് ഷാജി പീച്ചക്കര, വൈസ് പ്രസിഡൻ്റ് ജിജി പുളിക്കൽ എന്നിവർ അറിയിച്ചു.
