കോതമംഗലം: പ്രതീക്ഷിച്ച പദ്ധതി ചെലവിന്റെ ഏറിയ പങ്കും ചെലവഴിച്ചിട്ടും ഒരു രൂപയുടെ പോലും നേട്ടമുണ്ടാക്കാന്‍ കഴിയാതെ ഭൂതത്താന്‍കെട്ട് മിനി ജലവൈദ്യുത പദ്ധതി. കെടുകാര്യസ്ഥതയുടെയും ദീര്‍ഘവീഷണമില്ലായ്മയുടേയും വലിയ ഉദാഹരമാകുകയാണ് പദ്ധതി. പത്ത് വര്‍ഷം മുമ്പ് 90 ശതമാനം നിര്‍മ്മാണപ്രവര്‍ത്തനങ്ങളും പൂര്‍ത്തീകരിച്ചതാണ്. കമ്മീഷനിംഗ് മുടങ്ങിയതോടെ മുടക്കിയ പണം വെള്ളത്തിലായ സ്ഥിതിയായി.
രണ്ട് വര്‍ഷംകൊണ്ട് പൂര്‍ത്തീകരിക്കാന്‍ ലക്ഷ്യമിട്ട് 2014-15 വര്‍ഷത്തില്‍ നിര്‍മ്മാണം ആരംഭിച്ച പദ്ധതിയാണിത്. ചൈനീസ് സാങ്കേതിക വിദ്യയായ ബള്‍ബ് ടര്ബൈന് ഉപയോഗപ്പെടുത്തുന്ന വിധമാണ് ഭൂതത്താന്‍കെട്ട് മിനി ജലവൈദ്യുതി പദ്ധതി ആസൂത്രണം ചെയ്തത്. കുറഞ്ഞ ഉയരത്തില്‍ നിന്ന് ഒഴുകുന്ന വെള്ളത്തില്‍ നിന്നും കൂടുതല്‍ വൈദ്യുതി ഉത്പ്പാദിപ്പിക്കാന്‍ കഴിയുമെന്നതാണ് ഈ സാങ്കേതിക വിദ്യയുടെ നേട്ടമായി പറയുന്നത്. ഇന്ത്യയില്‍ ഈ സാങ്കേതിക വിദ്യ ഉപയോഗിച്ചുള്ള പദ്ധതികള്‍ വിരളമാണ്.
ബള്‍ബ് ടര്ബൈന് അനുയോജ്യമായ വിധത്തിലാണ് പദ്ധതിയുടെ ഡിസൈന്‍ എന്നതിനാല്‍ മറ്റ് മാര്‍ഗങ്ങളിലേക്ക് തിരിയുക എളുപ്പമല്ല. സിവില്‍ വര്‍ക്കുകളും മെക്കാനിക്കല്‍ വര്‍ക്കുകളും അവസാനഘട്ടത്തിലെത്തിയിരുന്നു. സാങ്കേതിക വിദ്യ മാറിയാല്‍ ഡിസൈനിലും നിര്‍മ്മിതിയിലും മാറ്റം വരുത്തേണ്ടി വരും. ഫലപ്രാപ്തി സംശയത്തിലാണെന്നതിനൊപ്പം അധിക സാമ്പത്തികഭാരവും ഉണ്ടാകും. ചൈനീസ് ഉപകരണങ്ങളുടെ ഇറക്കുമതി സാദ്ധ്യമാക്കാനുള്ള എല്ലാ ശ്രമങ്ങളും നടത്താനാണ് കെ.എസ്.ഇ.ബി.യുടെ നിലവിലെ തീരുമാനം.സാദ്ധ്യമായില്ലെങ്കില്‍ മറ്റൊരു സാങ്കേതിക വിദ്യ സ്വീകരിക്കുക എന്നത് മാത്രമാകും കെ.എസ്.ഇ.ബി.ക്ക് മുമ്പിലുള്ള പോംവഴി. അതല്ലെങ്കില്‍ ഇരുനൂറ് കോടിയോളം രൂപ മുടക്കിയ പദ്ധതി എന്നന്നേക്കുമായി ഉപേക്ഷിക്കേണ്ടി വരും.
