കോതമംഗലം: വിരല്‍തുമ്പുകളില്‍ നൂലിഴകള്‍ കൊണ്ട് വിസ്മയം തീര്‍ക്കുന്ന പിന്നല്‍ കലയില്‍ പുതിയൊരു ചരിത്രമെഴുതി വാരപ്പെട്ടിയിലെ കൊച്ചു മിടുക്കി. ഒരു മിനിറ്റിനുള്ളില്‍ 105 ക്രോച്ചേ സ്റ്റിച്ചുകള്‍ പൂര്‍ത്തിയാക്കി ഇന്ത്യന്‍ ബുക്ക് ഓഫ് റെക്കോര്‍ഡ്‌സില്‍ ഇടം നേടിയിരിക്കുകയാണ് കോതമംഗലം മാര്‍ത്ത മറിയം പബ്ലിക് സ്‌കൂളിലെ ആറാം ക്ലാസ് വിദ്യാര്‍ത്ഥിനി ജിയന്ന എലിസബത്ത് റെനി.
കഴിഞ്ഞ ലോക്ക്ഡൗണ്‍ കാലത്തെ വിരസത മാറ്റാനായി തുടങ്ങിയ ശീലമാണ് ജിയന്നയെ ഇന്ന് വലിയ അംഗീകാരത്തിന് അര്‍ഹയാക്കിയത്. റിട്ടയേര്‍ഡ് അധ്യാപികയായ അമ്മൂമ്മ മേരി ടീച്ചറുടെ പക്കല്‍ നിന്നാണ് ജിയന്ന ഈ വിദ്യ പഠിച്ചെടുത്തത്. വാരപ്പെട്ടി പള്ളിപ്പറമ്പില്‍ വീട്ടില്‍ മറൈന്‍ ബയോളജിസ്റ്റായ റെനിയുടെയും ഹയര്‍സെക്കന്‍ഡറി സ്‌കൂള്‍ അധ്യാപികയായ ലിജിനയുടെയും രണ്ടാമത്തെ മകളാണ് ജിയന്ന. സഹോദരി ഇസ മരിയയും പൂര്‍ണ്ണ പിന്തുണയുമായി കൂടെയുണ്ട്.നിലവിലെ റെക്കാര്‍ഡായിരുന്ന 61 എന്ന സംഖ്യയെ പരിശീലന സമയത്തു തന്നെ മറികടക്കാന്‍ കഴിഞ്ഞതാണ് മത്സരത്തില്‍ പങ്കെടുക്കാന്‍ ആത്മവിശ്വാസം കിട്ടിയതെന്ന് ജിയന്ന പറഞ്ഞു.
നിലവില്‍ ഒരു മിനിറ്റില്‍ ഏറ്റവും കൂടുതല്‍ ക്രോച്ചേ സ്റ്റിച്ചുകള്‍ നടത്തിയതിനുള്ള ലോക റെക്കോര്‍ഡ് 137 ആണ്. ഈ റെക്കോര്‍ഡ് മറികടക്കുക എന്ന ലക്ഷ്യത്തോടെ തീവ്രമായ പരിശീലനത്തിലാണ് ജിയന്നയും ഗുരുവായ അമ്മൂമ്മയും. കഠിനാധ്വാനവും കൃത്യതയും ഒത്തുചേര്‍ന്നാല്‍ ഗിന്നസ് നേട്ടം വിദൂരമല്ലെന്ന ഉറച്ച വിശ്വാസത്തിലാണ് ഈ കൊച്ചു പ്രതിഭ.
വെറുമൊരു വിനോദം എന്നതിലുപരി ക്രോച്ചേ കലയില്‍ തന്റെ സര്‍ഗ്ഗാത്മകത പ്രകടിപ്പിക്കാന്‍ ജിയന്ന ശ്രദ്ധിക്കുന്നു. കോട്ടന്‍ യാണുകളില്‍ അവള്‍ തീര്‍ക്കുന്ന ആകര്‍ഷകമായ ബാഗുകള്‍, വര്‍ണ്ണാഭമായ പൂക്കള്‍, തൊപ്പികള്‍, മറ്റ് കൗതുക വസ്തുക്കള്‍ എന്നിവ ബന്ധുക്കള്‍ക്കും സുഹൃത്തുക്കള്‍ക്കും സമ്മാനമായി നല്‍കുന്നതിലാണ് ജിയന്നയ്ക്ക് ഏറെ സന്തോഷം. പഠനത്തിലും പാഠ്യേതര വിഷയങ്ങളിലും ഒരേപോലെ തിളങ്ങുന്ന ജിയന്ന വായനയില്‍ അതീവ താല്പര്യം പുലര്‍ത്തുന്നതോടൊപ്പം കരാട്ടെയില്‍ ബ്ലാക്ക് ബെല്‍റ്റും കരസ്ഥമാക്കിയിട്ടുണ്ട്.
ഇന്ത്യയിലെ അസാധാരണമായ കഴിവുകളെയും നേട്ടങ്ങളെയും ലോകത്തിന് മുന്നിലെത്തിക്കുന്ന ഇന്ത്യന്‍ ബുക്ക് ഓഫ് റെക്കോര്‍ഡില്‍ വിരല്‍തുമ്പിലെ വേഗതയും കൃത്യതയും അളന്നാണ് ജിയന്നയുടെ പേര് ഇടംപിടിച്ചത്.
