കോതമംഗലം: ആലുവ – മൂന്നാര് രാജപാത പുനര് നിര്മ്മാണം കോടതി നിര്ദ്ദേശങ്ങള് കൂടി പരിശോധിച്ച് തുടര് നടപടികള് സ്വീകരിക്കുമെന്ന് പൊതുമരാമത്ത് – ടൂറിസം വകുപ്പ് മന്ത്രി പി.എ മുഹമ്മദ് റിയാസ് നിയമസഭയില് അറിയിച്ചു. ആലുവ മൂന്നാര് രാജപാതയുമായി ബന്ധപ്പെട്ട ആന്റണി ജോണ് എംഎല്എയുടെ സബ് മിഷന് മറുപടിയായിട്ടാണ് മന്ത്രി സഭയില് ഇക്കാര്യം വ്യക്തമാക്കിയത്. എംഎല്എ നിരവധി തവണ ഈ ആവശ്യം ഉന്നയിച്ചിരുന്നു.
വിഷയത്തില് ചില പരിശോധനകള് പൊതുമരാമത്ത് വകുപ്പ് നടത്തുകയും ചെയ്തിരുന്നു. നിലവില് ഈ റോഡുമായി ബന്ധപ്പെട്ട വിഷയം ഹൈക്കോടതിയുടെ പരിഗണനയിലാണ് ഉള്ളത്. ഹൈക്കോടതി നിര്ദ്ദേശപ്രകാരം ഉള്ള റോഡ് അളന്നു തിട്ടപ്പെടുത്തുന്നതിന് ഹൈലെവല് എക്സ്പേര്ട്ട് കമ്മിറ്റി രൂപീകരിച്ചിരുന്നു. തഹസില്ദാര്മാര്, ഫോറസ്റ്റ് റേഞ്ച് ഓഫീസര്മാര്, പൊതുമരാമത്ത് എക്സിക്യൂട്ടിവ് എഞ്ചിനിയര് എന്നിവര് ഉള്പ്പെട്ട സബ് ലെവല് കമ്മിറ്റി പരിശോധന നടത്തി റിപ്പോര്ട്ട് സമര്പ്പിച്ചിട്ടുണ്ട്.
കോടതി നിര്ദ്ദേശം കൂടി പരിഗണിച്ച് തുടര്നടപടികള് സ്വീകരിക്കുവാന് കഴിയും. ആലുവ മൂന്നാര് രാജപാത യാഥാര്ത്ഥ്യമായാല് അത് കേരളത്തിന്റെ കാര്ഷിക – ടൂറിസം മേഖലയ്ക്ക് വലിയ കുതിച്ചു ചാട്ടം ഉണ്ടാക്കുന്ന ഒന്നായി മാറും. ആലുവയില് നിന്നും മൂന്നാറിലേക്ക് 20 കിലോ മീറ്ററോളം ദൂരം കുറഞ്ഞു കിട്ടും. അതോടൊപ്പം ഈ മേഖലകളിലെ ആദിവാസി ജനവിഭാഗങ്ങളുടെ ഉന്നമനത്തിനും അത് ഗുണകരമായി മാറുന്നതാണ് . അതുകൊണ്ടു തന്നെ വനംവകുപ്പുമായി ഉള്പ്പെടെ തുടര്ന്നു സംസാരിച്ച് ഇതിന്റെ സാദ്ധ്യതകള് തുടര്ന്നും പരിശോധിക്കുമെന്നും മന്ത്രി സബ്മിഷനു മറുപടിയായി നിയമസഭയില് അറിയിച്ചു.
