കോതമംഗലം: നിയമം നടപ്പാക്കുന്നതിനിടെ പോലീസിന് വീഴ്ചകകളുണ്ടായാല് തിരുത്താന് നിയമത്തില് തന്നെ വ്യവസ്ഥകളുണ്ടെന്നും ആള്ക്കൂട്ടവും ജനക്കൂട്ടവും പോലീസിനെ നന്നാക്കാനിറങ്ങിയാല് എന്താകും ഫലമെന്ന് ചരിത്രം പരിശോധിച്ചാല് മനസിലാകുമെന്നും റേഞ്ച് ഡിഐജി ഡോ.അരുള് ആര്.ബി. കൃഷ്ണ പറഞ്ഞു. തിരുവനന്തപുരത്ത് പോലീസിനെ ആക്രമിച്ച സംഭവത്തെ ആരും ന്യായീകരിക്കേണ്ടതില്ല. പോലീസിനെ കുറ്റപ്പെടുത്തി കല്ലെറിയുമ്പോള് കൂടെകൂടാന് ആളുകള് ഏറെയുണ്ടാകും. അത് ഡ്യൂട്ടി നിര്വഹണത്തെ ബാധിക്കരുത്. കോതമംഗലത്ത് പോലീസ് ഓഫീസേഴ്സ് അസോസിയേഷന് സമ്മേളനം ഉദ്ഘാടനം ചെയ്യുകയായിരുന്നു അദേഹം.
തിരുവനന്തപുരത്ത് മിഥുന് റോയി എന്ന പോലീസ് ഉദ്യോഗസ്ഥനെതിരെയുണ്ടായ ആക്രമണത്തില് അസോസിയേഷന് ശക്തമായ പ്രതിഷേധം രേഖപ്പെടുത്തി. പോലീസ് ഉദ്യോഗസ്ഥന് ഉത്തരവാദിത്വപ്പെട്ട കൃത്യനിര്വഹണത്തിന്റെ ഭാഗമായി ചെയ്യുന്ന കാര്യങ്ങള്ക്കെതിരെ വസ്തുതാവിരുദ്ധ പ്രചരണം നടത്തുകയും ദേഹോപദ്രവം ഏല്പ്പിക്കുകയും ചെയ്യുന്നവര്ക്ക് കടുത്ത ശിക്ഷ ലഭിക്കുന്നവിധം നിയമനിര്മ്മാണം നടത്തണം. പോലീസ് ഉദ്യോഗസ്ഥരുടെ സ്വകാര്യജീവിതത്തിന് ഭംഗംവരുത്തുന്ന വിധം വാസസ്ഥലത്തേക്കും മറ്റും പ്രതിഷേധങ്ങള് സംഘടിപ്പിക്കുന്നതിലും വീടുകയറി ആക്രമിക്കുന്നതിലും പ്രതിഷേധം രേഖപ്പെടുത്തികൊണ്ടുളള പ്രമേയം സമ്മേളനത്തില് അവതരിപ്പിച്ചു.
