കോതമംഗലം: മാര്‍ അത്തനേഷ്യസ് കോളേജിലെ ബയോഡൈവേഴ്‌സിറ്റി ക്ലബ്ബും, ഭൂമിത്രസേനയും ചേര്‍ന്ന് പത്മശ്രീ ജേതാവും പ്രശസ്ത പരിസ്ഥിതി പ്രവര്‍ത്തകയുമായ കൊല്ലക്കല്‍ ദേവകിയമ്മയെ ആദരിച്ചു.ആലപ്പുഴ മുതുകുളത്തെ തപോവനത്തിലെ അവരുടെ വനഗൃഹം സന്ദര്‍ശിച്ചാണ് ”ഗ്രീന്‍ സല്യൂട്ട്” നല്‍കി ആദരിച്ചത്. എംഎ കോളേജിലെ വിദ്യാര്‍ത്ഥി സംഘവും അധ്യാപകരും ദേവകിയമ്മ സ്വയം സൃഷ്ടിച്ച സമൃദ്ധമായ മനുഷ്യനിര്‍മിത വനത്തില്‍ ഗ്രീന്‍ വാക്ക് നടത്തി സസ്യസമ്പത്ത് അടുത്തറിഞ്ഞു.
മുതുകുളത്ത് അഞ്ചേക്കറോളം സ്ഥലത്ത് സ്വന്തമായി വനം (കൊല്ലക്കല്‍ തപോവനം) വെച്ചുപിടിപ്പിച്ച പരിസ്ഥിതി പ്രവര്‍ത്തകയാണ് പത്മശ്രീ ദേവകിയമ്മ. 2026-ലെ പത്മശ്രീ പുരസ്‌കാരം നല്‍കി രാജ്യം അവരെ ആദരിച്ചിരുന്നു. 92 വയസ്സുള്ള ദേവകിയമ്മ, 3,000-ത്തിലധികം അപൂര്‍വ സസ്യങ്ങളും ഔഷധസസ്യങ്ങളും നട്ടുപിടിപ്പിച്ച് പ്രകൃതി സംരക്ഷണത്തിന് നല്‍കിയ നിസ്തുല സംഭാവനകളാണ് ഈ അംഗീകാരത്തിന് അവരെ അര്‍ഹയാക്കിയത് .എം. എ. കോളേജ് ബയോഡൈവേഴ്‌സിറ്റി ക്ലബ്ബിന്റെയും, ഭൂമിത്രസേനയുടെയും കോഓര്‍ഡിനേറ്റര്‍മാരായ ബോട്ടണി വിഭാഗം അസി. പ്രൊഫ. ഡോ. ശരത് ജി. നായര്‍, ഡോ. ജയലക്ഷ്മി പി എസ് എന്നിവരും, വിദ്യാര്‍ത്ഥികളും ചേര്‍ന്ന് ദേവകിയമ്മയെ പൊന്നാട അണിയിച്ച്, ഫലകം നല്‍കി ആദരിച്ചു.
1970-കളില്‍ സ്വന്തം വീട്ടുവളപ്പില്‍ ഒരു തൈ നട്ടാണ് ദേവകിയമ്മ തന്റെ പരിസ്ഥിതി യാത്ര ആരംഭിച്ചത്. കാലക്രമേണ, ഇന്ന് ഏകദേശം 5 ഏക്കറിലായി വ്യാപിച്ചിരിക്കുന്ന ഈ വനത്തില്‍ 3,000-ത്തിലധികം മരങ്ങളും നിരവധി അപൂര്‍വ സസ്യങ്ങളും വളരുന്നു. പക്ഷികളുടെയും മറ്റ് ജീവജാലങ്ങളുടെയും ആവാസകേന്ദ്രമായി മാറിയ ഈ വനമേഖല, വനസമ്പത്ത് കുറവുള്ള ആലപ്പുഴ ജില്ലയില്‍ ഒരു പ്രധാന മൈക്രോ-ഇക്കോസിസ്റ്റമായി മാറിയിട്ടുണ്ട്. കോളേജിലെ ബയോഡൈവേഴ്‌സിറ്റി ക്ലബ്ബിന്റെയും ഭൂമിത്രസേനയുടെയും നേതൃത്വത്തില്‍ നടക്കുന്ന പരിസ്ഥിതി ബോധവത്കരണ പ്രവര്‍ത്തനങ്ങളുടെ ഭാഗമായിട്ടാണ് ആദരവ് പരിപാടി സംഘടിപ്പിച്ചത്.
