കോതമംഗലം: വോട്ടുപിടുത്തത്തിനിടയില്‍ പാമ്പുപിടിക്കുന്ന ഒരു സ്ഥാനാര്‍ത്ഥിയുണ്ട് കോതമംഗലത്ത്. കോട്ടപ്പടി പഞ്ചായത്തിലെ മൂന്നാം വാര്‍ഡ് സ്വതന്ത്ര സ്ഥാനാര്‍ത്ഥി ജ്യൂവല്‍ ജൂഡിയാണ് താരം. കൊടും വിഷമുള്ള രാജവെമ്പാലയോ, മൂര്‍ഖനോ, വിഷമില്ലാത്തതോ എന്തുമായിക്കോട്ടെ പാമ്പ് എന്ന് കേട്ടാല്‍ ഉടന്‍ ജ്യൂവലിന് വിളിയെത്തും. ജ്യൂവലിന്റെ നാടായ കോട്ടപ്പടി ഒരു വനാതിര്‍ത്തി മേഖലയാണ്. പാമ്പുകള്‍ മാത്രമല്ല കാട്ടാനകളും, മറ്റ് വന്യമൃഗങ്ങളും ഈ പ്രദേശവാസികളുടെ ഉറക്കം കെടുത്തുന്നത് പതിവാണ്. ഏത് രാത്രിയിലും നാട്ടുകാരുടെ വിളി വന്നാല്‍ ജ്യൂവല്‍ ഉടന്‍ സ്ഥലത്ത് എത്തും. വന്യമൃഗശല്യത്തിന് പരിഹാരം കാണണമെന്ന ആവശ്യമുയര്‍ത്തി നിരവധി സമരങ്ങള്‍ നടന്നു. അതിലും മുന്നില്‍ നിന്ന് നയിക്കാന്‍ ജ്യൂവല്‍ ഉണ്ടായിരുന്നു.
തൃക്കാരിയൂര്‍,തുളുശ്ശേരിക്കവലക്ക് സമീപം ഞാളുമഠം മധുസൂദനന്‍ നായരുടെ മുറ്റത്ത് രാത്രി കണ്ട പെരുമ്പാമ്പിനെ പിടികൂടാനാണ് സഞ്ചിയും, സ്റ്റിക്കുമായി ജ്യൂവല്‍ എത്തിയത്. സ്ഥാനാര്‍ത്ഥിയാണെന്നറിഞ്ഞതോടെ ആള്‍ക്കൂട്ടത്തിനും കൗതുകമായി. ലക്ഷങ്ങളുടെ പ്രചാരണവും വലിയ വാഗ്ദാനങ്ങളുമില്ലെങ്കിലും ജനങ്ങളുടെ ജീവന്‍ രക്ഷിച്ച അനുഭവങ്ങളും ആത്മവിശ്വാസവുമായാണ് സേവനത്തിന്റെ തുടര്‍ച്ചക്കായി ജനാധിപത്യ പോരാട്ടത്തിന് ജ്യൂവല്‍ ഇറങ്ങിത്തിരിച്ചിരിക്കുന്നത്.രാത്രിയെന്നോ പകലെന്നോ വ്യത്യാസമില്ലാതെ ഏത് സമയത്തായാലും പാമ്പോ, കാട്ടാനയോ വന്നാല്‍ ഓടിയെത്താറുണ്ടെന്നും. അത് ഒരു ബാധ്യതയായി കാണുന്നില്ലെന്നും, നാട്ടുകാരുടെ അഭ്യര്‍ത്ഥന മാനിച്ചാണ് സ്ഥാനാര്‍ത്ഥിയായ തെന്നും ജ്യൂവല്‍ പറഞ്ഞു.
