കവളങ്ങാട്: നവീകരിച്ച കൊച്ചി – ധനുഷ്‌ക്കോടി ദേശീയപാതയിൽ കവളങ്ങാട് കവലക്ക് സമീപം ശുദ്ധജല വിതരണ മെയിൻ പൈപ്പ് പൊട്ടി ലക്ഷക്കണക്കിന് ലിറ്റർ കുടിവെള്ളം പാഴാകാൻ തുടങ്ങിയിട്ട് ആഴ്ചകളായിട്ടും നടപടിയെടുക്കാതെ ദേശീയപാത അധികൃതരും വാട്ടർ അതോറിറ്റിയും. പൈപ്പ് പൊട്ടി റോഡിന് നടുവിലൂടെ വെള്ളം ഒഴുക്കുന്നതിനാൽ കാൽനടയാത്രക്കാരും പ്രദേശവാസികളും കടുത്ത ദുരിതത്തിലാണ്.
നേര്യമംഗലം ആവോലിച്ചാലിൽ നിന്ന് പെരിയാറ്റിലെ ജലം ശുദ്ധീകരിച്ച് കവളങ്ങാട്, പല്ലാരിമംഗലം പഞ്ചായത്തുകളിൽ വിതരണം ചെയ്യുന്ന പ്രധാന പൈപ്പാണ് പൊട്ടിയത്. ദേശീയപാത വീതികൂട്ടി നവീകരിച്ച സമയത്ത് റോഡിലുണ്ടായിരുന്ന പൈപ്പ് വശങ്ങളിലേക്ക് മാറ്റിസ്ഥാപിക്കാതെ, അതിനു മുകളിലൂടെ റോഡ് അശാസ്ത്രീയമായി ടാർ ചെയ്തതാണ് പൈപ്പ് പൊട്ടാൻ കാരണമായതെന്ന് നാട്ടുകാർ ആരോപിക്കുന്നു.
പൈപ്പ് പൊട്ടി വെള്ളം നഷ്ടപ്പെടുന്നതിനാൽ നെല്ലിമറ്റം, കവളങ്ങാട്, പൈമറ്റം, കുറുങ്കുളം, പുലിയൻപാറ, കതിരുവേൽതണ്ട് തുടങ്ങിയ ഉയർന്ന പ്രദേശങ്ങളിലെ കുടിവെള്ള വിതരണവും തടസ്സപ്പെട്ടിരിക്കുകയാണ്.
റോഡിന് നടുവിലുള്ള കുടിവെള്ള പൈപ്പുകൾ എത്രയും വേഗം വശങ്ങളിലേക്ക് മാറ്റിസ്ഥാപിച്ച് കുടിവെള്ള വിതരണം പുനഃസ്ഥാപിക്കണമെന്ന് എച്ച്എംഎസ് ട്രേഡ് യൂണിയൻ ആവശ്യപ്പെട്ടു.
അല്ലാത്തപക്ഷം ശക്തമായ പ്രതിഷേധ പരിപാടികളുമായി മുന്നോട്ടുപോകുമെന്ന് എച്ച്എംഎസ് സംസ്ഥാന വൈസ് പ്രസിഡന്റ് മനോജ് ഗോപി, നിയോജകമണ്ഡലം പ്രസിഡന്റ് വാവച്ചൻ തോപ്പിൽകുടി എന്നിവർ അറിയിച്ചു. ഭാരവാഹികളായ ജോയി വർഗ്ഗീസ്, എ.പി വാവച്ചൻ തുടങ്ങിയവരും യോഗത്തിൽ പങ്കെടുത്തു.
