കോതമംഗലം: വാരപ്പെട്ടി പഞ്ചായത്ത് അഞ്ചാം വാര്‍ഡ് ഏറാമ്പ്ര പള്ളിക്ക് മേല്‍ഭാഗത്ത് കുടിവെള്ളമില്ലെന്ന് പരാതി. ഈ പ്രദേശത്ത് ഏഴോളം വീട്ടുകാര്‍ താമസിക്കുന്നുണ്ട്. പഞ്ചായത്തില്‍ നിന്നും ലൈഫില്‍ നിന്നും പണിതുകൊടുത്ത വീട്ടുകാരാണ് ഇവിടെയുള്ളത്. പ്രദേശത്ത് ആര്‍ക്കും കിണര്‍ സൗകര്യമില്ല. കിണര്‍ കുഴിച്ചെങ്കിലും വെള്ളം കിട്ടാത്ത സ്ഥിതിയാണ്. കുടിവെള്ള പൈപ്പ് കണക്ഷനും ഇവിടെയെത്തിയിട്ടില്ല. വാരപ്പെട്ടി പഞ്ചായത്തധികൃതര്‍ കുടിവെള്ളത്തിനായി കുഴല്‍ കിണര്‍ നിര്‍മിച്ചുനല്‍കുമെന്ന് പറഞ്ഞിരുന്നെങ്കിലും ഇതുവരെ കുഴല്‍കിണറും നിര്‍മിച്ചിട്ടില്ല.
കുഴല്‍ കിണര്‍ നിര്‍മിക്കാനാവശ്യമായ സ്ഥലം പ്രദേശവാസികള്‍ ചേര്‍ന്ന് വാങ്ങി പഞ്ചായത്തിന് എഴുതി നല്‍കിയിട്ടുമുണ്ട്്. എന്നാല്‍, പഞ്ചായത്തധികൃതര്‍ തിരിഞ്ഞുനോക്കാത്ത സ്ഥിതിയാണ്. ഇതോടെ മഴക്കാലമായാലും വേനല്‍കാലമായാലും ഒരു തുള്ളി പോലും വെള്ളം കിട്ടാത്ത അവസ്ഥയിലാണ് പ്രദേശവാസികള്‍. ഇതിനൊരു ശാശ്വത പരിഹാരം വേണമെന്നാണ് പ്രദേശവാസികളുടെ ആവശ്യം.
