മൂവാറ്റുപുഴ: വെങ്ങോല ഇരട്ടക്കൊലപാതക കേസില്‍ പ്രതിക്ക് ഇരട്ട ജീവപര്യന്തം വിധിച്ച് മൂവാറ്റുപുഴ കോടതി. ഭാര്യയെയും മൂന്ന് മാസം പ്രായമുള്ള കുഞ്ഞിനേയും കൊലപ്പെടുത്തിയ കേസിലാണ് ആസാം സ്വദേശി അബ്ദുള്‍ ഹക്കീമനെ കോടതി ശിക്ഷിച്ചത്. പെരുമ്പാവൂര്‍ വെങ്ങോല ഒര്‍ണ ഭാഗത്ത് നടന്ന ഇരട്ട കൊലപാതകത്തിലാണ് ആസാം സ്വദേശി അബ്ദുള്‍ ഹക്കീമിന് മൂവാറ്റുപുഴ അഡീഷ്ണല്‍ ഡിസ്ട്രികട് ആന്റ് സെഷന്‍സ് കോടതി ജഡ്ജ് ടോമി വര്‍ഗീസ് ഇരട്ടജീവപര്യന്തം തടവും, രണ്ട് ലക്ഷം രൂപ പിഴയും വിധിച്ചത്.
2005 ഏപ്രിലാണ് ഭാര്യ മെഹമൂദയേയും മൂന്ന് മാസം പ്രായമുള്ള ആണ്‍കുട്ടിയേയും പ്രതി കൊലപ്പെടുത്തിയത്. ഭാര്യയും കുഞ്ഞിനെയും ഒഴിവാക്കി മറ്റൊരു വിവാഹം കഴിക്കുന്നതിനു വേണ്ടിയിട്ടാണ് പ്രതി കൊലപാതകം നടത്തിയത്. ദൃക്‌സാക്ഷികള്‍ ഇല്ലാതിരുന്ന കേസില്‍ സാഹചര്യ തെളിവുകളുടേയും, ശാസ്ത്രിയ തെളിവുകളുടേയും അടിസ്ഥാനത്തിലാണ് പ്രതിക്കെതിരെ കുറ്റം തെളിയിക്കാന്‍ സാധിച്ചത്. പെരുമ്പാവൂര്‍ പോലീസ് ഇന്‍സ്‌പെക്ടര്‍ എസ്.മുഹമ്മദ് റിയാസാണ് പ്രതിക്കെതിരെ കുറ്റപത്രം ഹാജരാക്കിയത്. പ്രോസിക്യൂഷനായി അഡി.പബ്ലിക് പ്രോസിക്യുട്ടര്‍ കെ.എസ്.ജ്യോതികുമാര്‍, അഭിലാഷ് മധു എന്നിവര്‍ ഹാജരായി.
