പെരുമ്പാവൂര്‍: നാലുകിലോ കഞ്ചാവുമായി ഇതര സംസ്ഥാന തൊഴിലാളിയുള്‍പ്പടെ രണ്ടുപേര്‍ പിടിയില്‍. രണ്ടര കിലോ കഞ്ചാവുമായി പശ്ചിമ ബംഗാള്‍ മുര്‍ഷിദാബാദ് സ്വദേശി റോക്കിദാസ് (25), ഒന്നര കിലോയോളം കഞ്ചാവുമായി പുക്കാട്ടുപടി തോട്ടുങ്ങല്‍ പറമ്പില്‍ യദുകൃഷ്ണന്‍ (24) എന്നിവരെയാണ് പെരുമ്പാവൂര്‍ എഎസ്പിയുടെ പ്രത്യേക അന്വേഷണസംഘവും തടിയിട്ടപറമ്പ് പോലീസും ചേര്‍ന്ന് പിടികൂടിയത്. ബുധനാഴ്ച രാത്രി സൗത്ത് വാഴക്കുളം ഭാഗത്തുനിന്നാണ് റോക്കി ദാസിനെ പിടികൂടിയത്. പെരുമ്പാവൂര്‍ ഭാഗത്തേക്ക് സ്‌കൂട്ടറില്‍ കഞ്ചാവ് കടത്തുകയായിരുന്നു. മഞ്ഞുമ്മല്‍ ഭാഗത്ത് താമസിച്ചിരുന്ന ഇയാള്‍ രാത്രികാലങ്ങളിലാണ് ഇയാള്‍ കഞ്ചാവ് കടത്തിയിരുന്നത്. ബംഗാളില്‍നിന്ന് ട്രെയിന്‍ മാര്‍ഗം എത്തിക്കുന്ന കഞ്ചാവ് മഞ്ഞുമ്മലില്‍ സൂക്ഷിച്ചതിനുശേഷം രാത്രികാലങ്ങളില്‍ വില്‍പ്പന നടത്തിവരികയായിരുന്നു. പ്രതിയുടെ ബാഗില്‍നിന്ന് കഞ്ചാവ് തൂക്കാന്‍ ഉപയോഗിക്കുന്ന ത്രാസും കണ്ടെത്തി. പോലീസിന്റെ കണ്ണില്‍ പെടാതിരിക്കാന്‍ ഇടവഴികളിലൂടെയായിരുന്നു ഇയാള്‍ സഞ്ചരിച്ചിരുന്നത്. കഞ്ചാവ് വില്പനയ്ക്കായി ബൈക്കില്‍ സഞ്ചരിക്കുമ്പോഴാണ് പുക്കാട്ടുപടിയില്‍വച്ച് യദുകൃഷ്ണനെ പിടികൂടിയത്. സിപ്പ് ലോക്ക് കവറുകളിലാക്കിയായിരുന്നു വില്പന. പെരുമ്പാവൂര്‍ എഎസ്പി ശക്തി സിംഗ് ആര്യ, സിഐ എ.എല്‍. അഭിലാഷ്, എസ്‌ഐമാരായ എ.ബി. സതീഷ്, ഉണ്ണികൃഷ്ണന്‍ എന്നിവരുടെ നേതൃത്വത്തിലായിരുന്നു അറസ്റ്റ്.
