കോതമംഗലം: യുവാവിനെ കുത്തി കൊലപ്പെടുത്താന്‍ ശ്രമിച്ച കേസില്‍ രണ്ട് പേര് അറസ്റ്റില്‍. നെല്ലിക്കുഴി ഗവ.ഹൈസ്‌കൂളിന് സമീപം താമസിക്കുന്ന ഇടയാലിക്കുടി അഷ്‌കര്‍ (27), ഇടയാലില്‍ യൂനസ് (31) എന്നിവരാണ് കോതമംഗലം പോലീസിന്റെ പിടിയിലായത്. കഴിഞ്ഞ 2ന് രാത്രി 8ഓടെ നെല്ലിക്കുഴി ഹൈസ്‌കൂളിന് സമീപമുള്ള റോഡിലാണ് പ്രതികള്‍ യുവാവിനെ കുത്തി കൊലപ്പെടുത്താന്‍ ശ്രമിച്ചത്. അതിഥിത്തൊഴിലാളിയെ ആക്രമിക്കുന്നത് യുവാവ് ചോദ്യം ചെയ്തതിനാണ് പ്രതികള്‍ യുവാവിനെ കുത്തിയത്. സംഭവത്തിന് ശേഷം ഒളിവില്‍ പോയ പ്രതികളെ പ്രത്യേകം സ്‌ക്വാഡ് രൂപീകരിച്ച് നടത്തിയ അന്വേഷണത്തില്‍ പെരുമ്പാവൂര്‍ കെ.എസ്.ആര്‍.ടി.സി സസ് സ്റ്റാന്‍ഡില്‍ നിന്നുമാണ് കസ്റ്റഡിയിലെടുത്തത്. പ്രതികളെ ഒളിവില്‍ കഴിയാന്‍ സഹായിച്ച മറ്റ് 4 പേര്‍ക്കെതിരെ കൂടി പോലീസ് കേസെടുത്തിട്ടുണ്ട്.പ്രതികളെ സഹായിച്ചതിന് നെല്ലിക്കുഴി സ്വദേശിയായ ജിതിനെ പോലീസ് നേരത്തെ അറസ്റ്റ് ചെയ്തിരുന്നു. മൂവാറ്റുപുഴ ഡി വൈ എസ് പി മുഹമ്മദ് റിയാസ്, കോതമംഗലം എസ്.എച്ച്. ഒ പി.ടി ബിജോയി, എ.എസ്.ഐ സലീം, എസ്.സി പി.ഒ മാരായ നിയാസ്, ഷെമീര്‍, സി.പി. ഒ കുഞ്ഞുമോന്‍, ഷിയാസ്, സനല്‍ എന്നിവരാണ് അന്വേഷണ സംഘത്തിലുണ്ടായിരുന്നത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
