കോതമംഗലം: അമേരിക്ക ആസ്ഥാനമായി പ്രവര്‍ത്തിക്കുന്ന അമേരിക്കന്‍ സൊസൈറ്റി ഓഫ് മെക്കാനിക്കല്‍ എഞ്ചിനീയര്‍സ്, ഇന്ത്യന്‍ മേഖലയിലെ എഞ്ചിനീയറിംഗ് കോളേജുകള്‍ക്ക് നല്‍കുന്ന മൂന്നു പ്രമുഖ പുരസ്‌കാരങ്ങള്‍ കോതമംഗലം മാര്‍ അത്തനേഷ്യസ് എഞ്ചിനീയറിംഗ് കോളേജ് കരസ്ഥമാക്കി. കഴിഞ്ഞ വര്‍ഷത്തെ എ.എസ്.എം.ഇ. സ്റ്റുഡന്റ് യൂണിറ്റിന്റെ പ്രവര്‍ത്തനങ്ങളെ അടിസ്ഥാനമാക്കി എം.എ എഞ്ചിനീയറിംഗ് കോളേജ് യൂണിറ്റിനെ രാജ്യത്തെ മികച്ച സ്റ്റുഡന്റ് യൂണിറ്റുകളില്‍ ഒന്നായി തിരഞ്ഞെടുത്തു. ഈ സ്റ്റുഡന്റ് യൂണിറ്റിന് നേതൃത്വം കൊടുക്കുന്ന മെക്കാനിക്കല്‍ വിഭാഗം പ്രൊഫസര്‍ ഡോ. ബോബിന്‍ ചെറിയാന്‍ ജോസിനെ മികച്ച അധ്യാപകനായും, കാര്‍ത്തിക്ക് രാധാകൃഷ്ണനെ മികച്ച വിദ്യാര്‍ത്ഥിയായും തിരഞ്ഞെടുത്തു. മെക്കാനിക്കല്‍ വിഭാഗം വിദ്യാര്‍ത്ഥികളായ ക്രിസ്റ്റി മാമന്‍, ഷിന്‍ജു ഷാജി, ഗോപിക അനില്‍ എന്നിവരുടെ ചിട്ടയായ പ്രവര്‍ത്തനങ്ങള്‍ ആണ് ഈ നേട്ടങ്ങള്‍ കരസ്ഥമാക്കുവാന്‍ സഹായിച്ചത്. പാഠ്യപദ്ധതികള്‍ക്ക് ഉപരിയായി കുട്ടികളുടെ എഞ്ചിനീയറിംഗ് കഴിവുകളെ വളര്‍ത്തിയെടുക്കുവാന്‍ കഴിഞ്ഞതിന്റെ അംഗീകാരമാണ് ഈ നേട്ടങ്ങള്‍ എന്ന് അസിസ്റ്റന്റ് പ്രൊഫസര്‍ ഡോ. കോര ടി സണ്ണി, മെക്കാനിക്കല്‍ വിഭാഗം മേധാവി ഡോ. സോണി കുര്യാക്കോസ്, പ്രിന്‍സിപ്പല്‍ ഡോ. ബോസ് മാത്യു ജോസ്, സെക്രട്ടറി ഡോ. വിന്നി വര്‍ഗീസ് എന്നിവര്‍ അറിയിച്ചു.
